«Jetisý» ÁKK-niń habarlaýy boıynsha, oblys ákiminiń tapsyrmasymen sońǵy jyldarda óńirde qant qyzylshasy baǵytynda 29 SDO, dándi daqyldar boıynsha – 7, kókónis – 1, júgeri – 2, kúrish – 4, kartop – 3, jem daıyndaýda 5 servıstik daıyndaý ortalyǵy qurylyp, olardyń jalpy sany 51-ge jetken. Atalmysh SDO-larda qarjylaı lızıń arqyly berilgen 1204 dana aýyl sharýashylyǵy tehnıkasy qyzmet kórsetýde. Sonyń ishinde bıylǵy jyly 6 SDO qurylyp, (3 – jem daıyndaý, 2 – kúrish, 1 – dándi daqyldar boıynsha) olarǵa 88 tehnıka alyp berildi. Zamanaýı tehnıkany jeńildik sharttarymen usynatyn servıstik-daıyndaý ortalyqtary is júzinde aýyldaǵy bıznesti damytýǵa zor yqpal etip, áleýmettik jobaǵa aınaldy.
Arnaıy tehnıkalar CLAAS, DEUTZ-FAHR, JohnDeere, FranzKleine, «Rostselmash», Mınsk traktor zaýyty jáne basqa da álemdik óndirýshi zaýyttardan satyp alynady. Tehnologıa barysynda kóp eńbekti qajet etetin prosester keń aýqymdy mashınalardyń kómegimen júzege asyrylady. Bul rette daqyldardy núktelik tehnologıamen sebý jáne olarǵa kútim jasaý egistikti aramshópsiz taza ustaýǵa jáne daqyl aralyǵynyń sırektigine qol eńbegin paıdalanbaı-aq qol jetkizýge múmkindik beredi.
– Osy sharalardyń barlyǵy shyǵyndardy birneshe ese ońtaılandyryp, kásipkerlerdiń shyǵyndaryn azaıtty. Oblys basshylyǵynyń qoldaýymen osy baǵyttaǵy jumystardy jalǵastyryp kelemiz, – dedi E.Orymbasarov.
Jalpy servıstik-daıyndaý ortalyqtarynyń jumysy aýyl sharýashylyǵy qurylymdaryn shoǵyrlanýǵa yntalandyrý, keshendi túrde óndiristik jáne marketıńtik qyzmetter kórsetý arqyly aýyl sharýashylyǵy óndirisiniń tıimdiligin arttyrý jáne sol arqyly aýyl halqynyń ómir súrý deńgeıin kóterýge baǵyttalǵan.
