«جەتىسۋ» اكك-نىڭ حابارلاۋى بويىنشا، وبلىس اكىمىنىڭ تاپسىرماسىمەن سوڭعى جىلداردا وڭىردە قانت قىزىلشاسى باعىتىندا 29 سدو، ءداندى داقىلدار بويىنشا – 7، كوكونىس – 1، جۇگەرى – 2، كۇرىش – 4، كارتوپ – 3، جەم دايىنداۋدا 5 سەرۆيستىك دايىنداۋ ورتالىعى قۇرىلىپ، ولاردىڭ جالپى سانى 51-گە جەتكەن. اتالمىش سدو-لاردا قارجىلاي ليزينگ ارقىلى بەرىلگەن 1204 دانا اۋىل شارۋاشىلىعى تەحنيكاسى قىزمەت كورسەتۋدە. سونىڭ ىشىندە بيىلعى جىلى 6 سدو قۇرىلىپ، (3 – جەم دايىنداۋ، 2 – كۇرىش، 1 – ءداندى داقىلدار بويىنشا) ولارعا 88 تەحنيكا الىپ بەرىلدى. زاماناۋي تەحنيكانى جەڭىلدىك شارتتارىمەن ۇسىناتىن سەرۆيستىك-دايىنداۋ ورتالىقتارى ءىس جۇزىندە اۋىلداعى بيزنەستى دامىتۋعا زور ىقپال ەتىپ، الەۋمەتتىك جوباعا اينالدى.
ارنايى تەحنيكالار CLAAS، DEUTZ-FAHR، JohnDeere، FranzKleine، «روستسەلماش»، مينسك تراكتور زاۋىتى جانە باسقا دا الەمدىك ءوندىرۋشى زاۋىتتاردان ساتىپ الىنادى. تەحنولوگيا بارىسىندا كوپ ەڭبەكتى قاجەت ەتەتىن پروسەستەر كەڭ اۋقىمدى ماشينالاردىڭ كومەگىمەن جۇزەگە اسىرىلادى. بۇل رەتتە داقىلداردى نۇكتەلىك تەحنولوگيامەن سەبۋ جانە ولارعا كۇتىم جاساۋ ەگىستىكتى ءارامشوپسىز تازا ۇستاۋعا جانە داقىل ارالىعىنىڭ سيرەكتىگىنە قول ەڭبەگىن پايدالانباي-اق قول جەتكىزۋگە مۇمكىندىك بەرەدى.
– وسى شارالاردىڭ بارلىعى شىعىنداردى بىرنەشە ەسە وڭتايلاندىرىپ، كاسىپكەرلەردىڭ شىعىندارىن ازايتتى. وبلىس باسشىلىعىنىڭ قولداۋىمەن وسى باعىتتاعى جۇمىستاردى جالعاستىرىپ كەلەمىز، – دەدى ە.ورىمباساروۆ.
جالپى سەرۆيستىك-دايىنداۋ ورتالىقتارىنىڭ جۇمىسى اۋىل شارۋاشىلىعى قۇرىلىمدارىن شوعىرلانۋعا ىنتالاندىرۋ، كەشەندى تۇردە وندىرىستىك جانە ماركەتينگتىك قىزمەتتەر كورسەتۋ ارقىلى اۋىل شارۋاشىلىعى ءوندىرىسىنىڭ تيىمدىلىگىن ارتتىرۋ جانە سول ارقىلى اۋىل حالقىنىڭ ءومىر ءسۇرۋ دەڭگەيىن كوتەرۋگە باعىتتالعان.
