– Búgingi kúnge oblys boıynsha koronavırýspen aýyrǵandar sany 2749 jetip, onyń ishinde 1290 adam jazylyp shyqty. Sońǵy táýlikte 8 adam koronavırýstyq ınfeksıa belgilerimen stasıonarǵa jatqyzyldy, – dedi Almaty oblysy ákiminiń orynbasary Batyrjan Baıjumanov.
Jalpy medısına qyzmetkerleriniń baqylaýynda 5581 adam bar, onyń ishinde stasıonarlyq emdeýde – 2583, sıpmtomsyz úı baqylaýynda 895 adam, úı karantıninde – 2103 adam jatyr.
Infeksıalyq bólimniń reanımasıada aýyr jáne óte aýyr jaǵdaıda 41 pasıent bar. 15 naýqas ókpeni jasandy jolmen jeldetý apparatyna qosylǵan. Búginde oblysta stasıonarda pnevmonıamen 2517 pasıent em-dom alýda. Bul kórsetkish ótken jylmen salystyrǵanda 2 jarym esege joǵary. Al, 86 naýqas aýyr hálde.
Ótken jyly pnevmonıadan 98 adam qaıtys bolsa, bıyl ókinishke oraı 190 adam kóz jumǵan.
Almaty oblysynda sońǵy aptada provızor bóliminen 618 adam emdelip shyqty. Jalpy alǵanda kúndelikti 150-den astam adam emdelip shyqsa, 200-ge jýyq naýqas emhanaǵa túsedi eken. Aýrýy asqynǵan pasıentter sanynyń ósýine baılanysty ınfeksıalyq stasıonarda sońǵy eki aptada tósek sanyn 3 ese ıaǵnı, 17 stasıonarlyq mekemede 150-den 500-ge deıin arttyryldy. Pnevmonıamen aýyratyn naýqastardy emdeý úshin 31 stasıonarda tósek sany myńnan úsh myńǵa deıin kóbeıtildi.
Jalpy stasıonarda em alyp jatqan adamdardyń basym kópshiligi 50 jastan asqan egde azamattar, onyń ishinde 90 paıyzy qan qysymy, júrek tamyr, qant dıabeti, obyr aýrýlarymen aýyrǵandar. Osyǵan baılanysty úlken jastaǵy adamdardy, sozylmaly aýrýlary bar naýqastardy densaýlyqtaryna asa jaýapty bolýǵa, sanıtarlyq talaptardy qatań saqtaýdy mamandar talap etýde dep túıindedi Batyrjan Qulaımergenuly.
