Búgin Qonaev qalasynda saltanatty shara ótip, onda Almaty oblysy ákiminiń orynbasary Almas Batanov, batys jáne soltústik óńirlerdegi sý tasqynynan zardap shekken turǵyndarǵa, baǵa jetpes kómek kórsetken Almaty oblysynyń birqatar azamattaryna, oblys basshysynyń atynan alǵysyn bildirip, laiyqty marapattar tabystady. Olardyń jankeshtiligi men erligi jáne gýmanitarlyq kómek berýi, Qazaqstan halqynyń yntymaǵy men birliginiń aiqyn kórinisin kórsetti, dep habarlaidy Dalanews.kz.
Tabiǵat apatynyń alǵashqy kúnderinen-aq, Almaty oblysynyń turǵyndary kómek qolyn sozýǵa belsene kiristi. 500-den astam eriktilerdi biriktiretin «Kúshimiz birlikte» volonterlik shtaby quryldy. Olar azyq-túlik, kiim-keshek, qurylys materialdary men turmystyq tehnikany qosa alǵanda, 400 tonnaǵa jýyq gýmanitarlyq júk jinady. Bul kómek sý tasqynynan eń kóp zardap shekken Batys Qazaqstan, Atyraý jáne Soltústik Qazaqstan oblystaryna der kezinde jóneltildi.
Qoldaý tek materialdyq resýrstarmen shektelmedi. Óńirdegi biznes qurylymdary arnaiy shotqa 90 million teńgeden astam qarjy aýdaryp, bul qarjy búlingen infraqurylymdy qalpyna keltirýge jáne muqtaj jandarǵa kómek kórsetýge jumsaldy. Almaty oblysynyń 50 qutqarýshysy men áskeri qyzmetkerleri, zardap shekken aimaqtardaǵy áriptesterimen iyq tirestire otyryp, adamdardy evakýatsiialaý jáne tabiǵi apattyń zardaptaryn joiýǵa belsene atsalysty.
«Búgin biz qiyn-qystaý kezeńde Otandastaryna kómek qolyn sozǵan naǵyz batyrlardy qurmetteimiz», - dedi oblys ákiminiń orynbasary Almas Batanov.
Osy igi iske atsalysqandardyń barlyǵyna, jáne osy saltanatty sharaǵa belgili sebeptermen qatysa almaǵandarǵa shynaiy alǵysyn bildirdi.
