Almaty oblysyna jańa ákimi belgili boldy
– Búgin birqatar kadrlyq ózgeristerge bailanysty Almaty oblysyna kelip otyrmyn. Memleket basshysynyń Jarlyǵymen Amandyq Ǵabbasuly Batalov Almaty oblysynyń ákimi laýazymynan bosatyldy. Amandyq Ǵabbasuly 7 jyldan astam ýaqyt Jetisý óńirine basshylyq etti. Osy jyldarda oblys jaqsy kórsetkishterge jetti, kóptegen iri jobalar iske asyrylyp, bul óńirdiń damýyna úlken serpin berdi. Memleket basshysy Amandyq Ǵabbasulynyń jumysyn óte jaqsy baǵalap, oblys ákimi laýazymynda kóp jyl jemisti qyzmet atqarǵany, óńirdi damytýǵa jáne oblystyń áleýmettik-ekonomikalyq áleýetin arttyrýǵa eleýli úles qosqany úshin alǵysyn jetkizýimdi tapsyrdy. Amandyq Ǵabbasulynyń mol tájiribesi, aqyl-keńesi qoǵam ómirinde áli de paidasyn tigizedi dep oilaimyn.
Búgin oblystyq máslihat depýtattarynyń kelisimen osy óńirdiń týmasy, buǵan deiin Jambyl, Pavlodar oblystaryn basqarǵan, Energetika ministrligine jetekshilik etken, birqatar ulttyq kompaniialardyń basshylyǵynda bolǵan, óte tájiribeli isker basshy Qanat Aldabergenuly Bozymbaev Prezidenttiń Jarlyǵymen Almaty oblysynyń ákimi bolyp taǵaiyndaldy. Almaty oblysynyń damýyn Prezident erekshe nazarda ustaidy. Sondyqtan jańa ákim alǵa qoiǵan mindetterdi laiyqty atqarady dep senemin, – degen Erlan Qoshanov Qanat Bozymbaevty jańa qyzmetimen quttyqtap, jumysyna sáttilik tiledi.
Munan soń Amandyq Batalov sóz alyp, Almaty oblysynda qyzmet etken 20 jyldai ýaqytta Jetisý jeri týǵan ólkesindei ystyq mekenge ainalǵanyn aitty.
– Eń aldymen kezinde meni joǵary laýazymǵa taǵaiyndap, mindet artqan Elbasyna úlken rahmet aitamyn. Memleket basshysy Qasym-Jomart Kemeluly ókilettigimdi uzartyp, bastaǵan isterimdi jalǵastyrýǵa múmkindik berip, senim bildirdi. Sondyqtan Memleket basshysyna aitar alǵysym zor. Osy jeti jylda ujymymmen birge úlken ister atqardyq, aýqymdy josparlardy oryndadyq. Bul rette ózińiz, Erlan Jaqanuly, únemi qoldaý tanyttyńyz, sol úshin rizashylyǵymdy bildiremin. Qanat Aldabergenulyn erte kezden tanimyn, qatar eńbek ettik. Almaty oblysyn basqarý osyndai bilikti mamanǵa senip tapsyrylǵanyna rizamyn, – degen Amandyq Batalov Qanat Bozymbaevqa qaltqysyz qyzmet, abyroily eńbek tiledi.
Qanat Aldabergenuly Almaty oblysyn basqarýdyń ózine senip tapsyrylýy zor jaýapkershilik ekenin jetkizdi.
–Almaty oblysynyń orny men úshin erekshe. Óitkeni Jetisý ata-babam ómir súrgen meken. Sondyqtan da ystyq. Jalpy oblystyń áleýeti zor, shekaraly aimaq. Ony halyqtyń igiligine paidalana bilýimiz kerek. Óńirde Amandyq Ǵabbasulynyń basshylyǵymen irgeli ister atqaryldy. Men de óz tarapymnan oblysty damytýǵa bar kúsh-jigerimdi jumsaimyn dep ýáde beremin. Halyqtyń senimin aqtaýǵa barymdy salamyn, – dedi Qant Bozymbaev.
Aktiv atynan oblystyq ardagerler keńesiniń tóraǵasy Ermek Kelemseiit, Isker áielder óńirlik keńesiniń tóraiymy Rimma Salyqova sóz alyp, el múddesi jolynda birlesip atqarǵan jumystary úshin Amandyq Ǵabbasulyna alǵys aityp, jańa ákim Qanat Bozymbaevtyń qyzmetine tabys tilep, qoldaý bildiretinderin jetkizdi.
Aktiv sońynda Qazaqstan Respýblikasy Prezidenti Ákimshiliginiń Basshysy Erlan Qoshanov máslihat depýtattaryna qoldaý bildirgeni úshin rizashylyq bildirip, kópshilikti el Táýelsizdiginiń 30 jyldyǵymen quttyqtady. Sol siiaqty oblysty damytýda investitsiia tartý, jańa jumys oryndaryn ashý, indetpen kúres sharalary basty basymdyq bolyp qala beretinin aitty.
