Jetisýlyqtar aldymen Tóle bi kesenesinde bolyp, sodan keiin Amandyq Batalov «Tashkent traktor zaýyty» men «Ýzagrotehmash» holdingilik kompaniiasy shyǵarǵan aýylsharýashylyq tehnikalarymen tanysty.
Almaty oblysynyń agrarlyq baǵytyn eskere otyryp, ózbek kásipkerleri aýylsharýashylyǵynda paidalanýǵa bolatyn traktor mashinalarynyń barlyq túrlerin kórsetti. Ózbekstan Úkimetiniń vitse-premeri Nadyr Atajanov pen «Ýzagrotehmash» kompaniiasynyń basqarma tóraǵasy Murat Kárimovpen bolǵan ekijaqty kezdesý barysynda oblys ákimi Jetisý aimaǵyndaǵy astyq jinaý jelisin ashý jónindegi pikirimen bólisti.
– Qazaqstan – Eýraziia ekonomikalyq odaǵynyń múshesi, sonymen qatar, bizdiń óńirimiz Qytai naryǵyna kiretin úlken qaqpanyń biri. Biz, sizderdi barlyq qajetti infraqurylymmen qamtylǵan «Taldyqorǵan» indýstrialdy aimaǵynda qurastyrý tsehyn ashýǵa shaqyramyz. Eskere ketetin jaǵdaidyń biri TMD arasynda qurǵaq port tek bizdiń óńirde ornalasqan, bul sizderdiń ónimderińizdi shet memleketterge qysqa ýaqyt merziminde jetkizýge septigin tigizedi, – dedi Amandyq Batalov.
Osy oraida, Ózbekstan vitse-premeri Nadyr Atajanov oblys ákiminiń aitqan usynysyna qyzyǵýshylyq tanyta otyryp, birlese jumys isteýge yntaly ekendigin bildirdi.
– Biz Qazaqstanmen júzege asyrǵymyz keletin birqatar jobalar bar jáne Almaty oblysynyń basshylyǵynan alynǵan naqty usynystar, olardy iske asyrýǵa negiz bolady. Mysaly, zaýyt ótken jyly 1,5 myń tehnika birligin óndirse, biyl bul kórsetkish 6 myńǵa jetkizbeshi. Bul syrtqy naryqqa shyǵýdyń da qajettigin kórsetip otyr. Ol úshin bizdiń elden arnaiy ókilder jaqyn arada Almaty oblysyna baryp, naryq múmkindikterin baǵalap kórmek, – dedi vitse-premer.
Iskerlik qaýymdastyq eki el arasyndaǵy investitsiialyq áleýetti talqylaýmen jalǵasty.
– 2018 jyldy eki eldiń basshylary «Ózbekstannyń Qazaqstandaǵy jyly» dep jariialady, bul eki ult arasyndaǵy yntymaqtastyqty joǵary deńgeige kóterýge jáne jańa kókjiekterin ashýǵa óz septigin tigizedi. Almaty oblysy – Qazaqstandaǵy tabiǵi resýrstarǵa bai, ári investitsiia salasyna klimaty qolaily aimaqtyń biri. Osy kezdesý arqyly eki jaq týysqandyq ári baýyrlastyq qarym-qatynasty ornata otyryp, kásipkerler ózara tiimdi seriktestik qatynastaryn damytýdyń jańa baǵyttaryn ashady degen úmitte.
2017 jyly Almaty oblysy Ózbekstanmen syrtqy taýar ainalysynda 36 mln. AQSh dollaryn quraǵanyn atap ótý kerek. Almaty oblysynan Ózbekstan memleketine eksport 15,8 mln., al import – 20,2 mln. AQSh dollaryn quraǵan.
– Ózbekstannan Qazaqstanǵa mineraldy tyńaitqyshtar, avtomobilder, jemister men kókónisterdi jáne basqa da aýylsharýashylyǵy ónimderin keletini belgili. Memleketter arasyndaǵy baýyrlastyq, kórshilik qarym-qatynastardyń jarqyn mysaldary ekonomika, ǵylym men mádeniet salalarynda da bar. Búgingi kezdesý Almaty oblysy men Ózbekstannyń kópqyrly bailanystaryn odan ári nyǵaityp, keńeitedi degen senimdemin, – dedi oblys ákimi.
900 orynǵa arnalǵan «Túrkistan» kontsert zalynda jetisýlyq ónerpazdar arnaiy kontserttik baǵdarlama usyndy.
Sonymen qatar turǵyndarǵa Almaty oblysynyń týristik áleýeti tanytatyn kórme men qolónershilerdiń buiymdary, qylqalam sheberleriniń týyndylary usynyldy.
Kontsert sońynda sóz alǵan Ózbekstannyń Mádeniet ministriniń birinshi orynbasary Ozodbek Nazarbekov Jetisý ónerpazdardyń joǵary kásibi deńgeiligi men óńirdiń rýhani bailyǵyn kórermenge erekshe sheberlikpen pash etkenderin jetkizdi.
Aita keteiik, Almaty oblysynyń delegatsiiasy óz saparlaryn sáýirdiń 15-ne deiin jalǵastyrmaq. Oblys ókilderi Ózbekstannyń birqatar qalalaryn aralai otyryp, Almaty oblysynyń investitsiialyq múmkindikterin keńinen tanystyrady.
Baljan QAIRATQYZY
