جەتىسۋلىقتار الدىمەن تولە بي كەسەنەسىندە بولىپ، سودان كەيىن اماندىق باتالوۆ «تاشكەنت تراكتور زاۋىتى» مەن «ۋزاگروتەحماش» حولدينگىلىك كومپانياسى شىعارعان اۋىلشارۋاشىلىق تەحنيكالارىمەن تانىستى.
الماتى وبلىسىنىڭ اگرارلىق باعىتىن ەسكەرە وتىرىپ، وزبەك كاسىپكەرلەرى اۋىلشارۋاشىلىعىندا پايدالانۋعا بولاتىن تراكتور ماشينالارىنىڭ بارلىق تۇرلەرىن كورسەتتى. وزبەكستان ۇكىمەتىنىڭ ۆيسە-پرەمەرى نادىر اتاجانوۆ پەن «ۋزاگروتەحماش» كومپانياسىنىڭ باسقارما ءتوراعاسى مۇرات كارىموۆپەن بولعان ەكىجاقتى كەزدەسۋ بارىسىندا وبلىس اكىمى جەتىسۋ ايماعىنداعى استىق جيناۋ جەلىسىن اشۋ جونىندەگى پىكىرىمەن ءبولىستى.
– قازاقستان – ەۋرازيا ەكونوميكالىق وداعىنىڭ مۇشەسى، سونىمەن قاتار، ءبىزدىڭ ءوڭىرىمىز جۇڭگو نارىعىنا كىرەتىن ۇلكەن قاقپانىڭ ءبىرى. ءبىز، سىزدەردى بارلىق قاجەتتى ينفراقۇرىلىممەن قامتىلعان «تالدىقورعان» يندۋستريالدى ايماعىندا قۇراستىرۋ سەحىن اشۋعا شاقىرامىز. ەسكەرە كەتەتىن جاعدايدىڭ ءبىرى تمد اراسىندا قۇرعاق پورت تەك ءبىزدىڭ وڭىردە ورنالاسقان، بۇل سىزدەردىڭ ونىمدەرىڭىزدى شەت مەملەكەتتەرگە قىسقا ۋاقىت مەرزىمىندە جەتكىزۋگە سەپتىگىن تيگىزەدى، – دەدى اماندىق باتالوۆ.
وسى ورايدا، وزبەكستان ۆيسە-پرەمەرى نادىر اتاجانوۆ وبلىس اكىمىنىڭ ايتقان ۇسىنىسىنا قىزىعۋشىلىق تانىتا وتىرىپ، بىرلەسە جۇمىس ىستەۋگە ىنتالى ەكەندىگىن ءبىلدىردى.
– ءبىز قازاقستانمەن جۇزەگە اسىرعىمىز كەلەتىن ءبىرقاتار جوبالار بار جانە الماتى وبلىسىنىڭ باسشىلىعىنان الىنعان ناقتى ۇسىنىستار، ولاردى ىسكە اسىرۋعا نەگىز بولادى. مىسالى، زاۋىت وتكەن جىلى 1،5 مىڭ تەحنيكا بىرلىگىن وندىرسە، بيىل بۇل كورسەتكىش 6 مىڭعا جەتكىزبەشى. بۇل سىرتقى نارىققا شىعۋدىڭ دا قاجەتتىگىن كورسەتىپ وتىر. ول ءۇشىن ءبىزدىڭ ەلدەن ارنايى وكىلدەر جاقىن ارادا الماتى وبلىسىنا بارىپ، نارىق مۇمكىندىكتەرىن باعالاپ كورمەك، – دەدى ۆيسە-پرەمەر.
ىسكەرلىك قاۋىمداستىق ەكى ەل اراسىنداعى ينۆەستيسيالىق الەۋەتتى تالقىلاۋمەن جالعاستى.
– 2018 جىلدى ەكى ەلدىڭ باسشىلارى «وزبەكستاننىڭ قازاقستانداعى جىلى» دەپ جاريالادى، بۇل ەكى ۇلت اراسىنداعى ىنتىماقتاستىقتى جوعارى دەڭگەيگە كوتەرۋگە جانە جاڭا كوكجيەكتەرىن اشۋعا ءوز سەپتىگىن تيگىزەدى. الماتى وبلىسى – قازاقستانداعى تابيعي رەسۋرستارعا باي، ءارى ينۆەستيسيا سالاسىنا كليماتى قولايلى ايماقتىڭ ءبىرى. وسى كەزدەسۋ ارقىلى ەكى جاق تۋىسقاندىق ءارى باۋىرلاستىق قارىم-قاتىناستى ورناتا وتىرىپ، كاسىپكەرلەر ءوزارا ءتيىمدى سەرىكتەستىك قاتىناستارىن دامىتۋدىڭ جاڭا باعىتتارىن اشادى دەگەن ۇمىتتە.
2017 جىلى الماتى وبلىسى وزبەكستانمەن سىرتقى تاۋار اينالىسىندا 36 ملن. اقش دوللارىن قۇراعانىن اتاپ ءوتۋ كەرەك. الماتى وبلىسىنان وزبەكستان مەملەكەتىنە ەكسپورت 15،8 ملن.، ال يمپورت – 20،2 ملن. اقش دوللارىن قۇراعان.
– وزبەكستاننان قازاقستانعا مينەرالدى تىڭايتقىشتار، اۆتوموبيلدەر، جەمىستەر مەن كوكونىستەردى جانە باسقا دا اۋىلشارۋاشىلىعى ونىمدەرىن كەلەتىنى بەلگىلى. مەملەكەتتەر اراسىنداعى باۋىرلاستىق، كورشىلىك قارىم-قاتىناستاردىڭ جارقىن مىسالدارى ەكونوميكا، عىلىم مەن مادەنيەت سالالارىندا دا بار. بۇگىنگى كەزدەسۋ الماتى وبلىسى مەن وزبەكستاننىڭ كوپقىرلى بايلانىستارىن ودان ءارى نىعايتىپ، كەڭەيتەدى دەگەن سەنىمدەمىن، – دەدى وبلىس اكىمى.
900 ورىنعا ارنالعان «تۇركىستان» كونسەرت زالىندا جەتىسۋلىق ونەرپازدار ارنايى كونسەرتتىك باعدارلاما ۇسىندى.
سونىمەن قاتار تۇرعىندارعا الماتى وبلىسىنىڭ تۋريستىك الەۋەتى تانىتاتىن كورمە مەن قولونەرشىلەردىڭ بۇيىمدارى، قىلقالام شەبەرلەرىنىڭ تۋىندىلارى ۇسىنىلدى.
كونسەرت سوڭىندا ءسوز العان وزبەكستاننىڭ مادەنيەت ءمينيسترىنىڭ ءبىرىنشى ورىنباسارى وزودبەك نازاربەكوۆ جەتىسۋ ونەرپازداردىڭ جوعارى كاسىبي دەڭگەيلىگى مەن ءوڭىردىڭ رۋحاني بايلىعىن كورەرمەنگە ەرەكشە شەبەرلىكپەن پاش ەتكەندەرىن جەتكىزدى.
ايتا كەتەيىك، الماتى وبلىسىنىڭ دەلەگاسياسى ءوز ساپارلارىن ءساۋىردىڭ 15-نە دەيىن جالعاستىرماق. وبلىس وكىلدەرى وزبەكستاننىڭ ءبىرقاتار قالالارىن ارالاي وتىرىپ، الماتى وبلىسىنىڭ ينۆەستيسيالىق مۇمكىندىكتەرىن كەڭىنەن تانىستىرادى.
بالجان قايرات قىزى
