Almaty oblysynda Qazaqstan Respýblikasynyń Memlekettik rámizderi kúnine arnalǵan «Tuǵyrly týym» atty jarqyn patriottyq saltanatty jiyn ótti, dep habarlaidy Dalanews.kz.
Shara ánurannyń shyrqalýy men memlekettik týdyń saltanatty túrde kóterilýi men oblys ákimi Marat Sultanǵazievtiń aqjarma tilegimen bastaldy.
«Qazaqstan Respýblikasynyń rámizderi bizdiń tarihymyzdy, mádenietimizdi jáne ulttyq qadir-qasietimizdi eske salady. Memlekettik rámizderimizde búkil Qazaqstan halqyn biriktiretin, jalpyulttyq biregeiligimizdi nyǵaitatyn qudiretti kúsh bar. Olar árqashan jańa jetistikterge jetý jolynda bizge shabyt berip, kúsh-qýatymyzdyń qainar kózi bolyp qala beredi», - dep quttyqtady óńir basshysy.
Jiyn «Qulansaz» folklorlyq-etnografiialyq ansambliniń «Kók týdyń jelbiregeni» atty patriottyq ándi oryndaýymen jalǵasty. Án jinalǵandardyń júregin tebirentip jáne Otanǵa degen maqtanysh sezimin oiatty. Sonymen qatar, 30 baikerden turatyn mototsiklshiler sherýi ótti. Olar el birligi men kúsh-qýatyn bildiretin Memlekettik týdy Ile aýdanynan bastap Qonaev qalasynyń ortalyq alańyna deiin jelbiretip jetkizdi.
Is-shara Qonaev qalasynyń kireberisinen ortalyq alańǵa deiingi retro kólikterdiń saltanatty sherýimen aiaqtaldy. Qonaev qalasyndaǵy retro kólik salonynyń jetekshisi jáne metsenat Murat Sirgebaev ta sherýdiń ishinde boldy. Túski saǵat 12:00-de 10 myńnan astam oblys turǵyndary biraýyzdan Qazaqstan Respýblikasynyń Ánuranyn shyrqap, eljandylyq pen erekshe kúige endi.
Saltanatty jiyn óńir basshysynyń quttyqtaýymen aiaqtaldy.
«Ardaqty aǵaiyn! Qadirli jerlester! Barshańyzdy Qazaqstan Respýblikasynyń Memlekettik rámizderi kúnimen shyn júrekten quttyqtaimyn! Bul mereke árbir azamattyń júregindegi Otansúigishtik sezimin kúsheitedi. Tý, Eltańba jáne Ánuran – memlekettiń egemendigi men birtutastyǵyn beineleitin, basty simvoldar.
Prezidentimiz Qasym-Jomart Kemeluly Toqaev: «Kók bairaǵymyz – myzǵymas memlekettiliktiń belgisi. Eltańbamyz – azattyqtyń aishyqty kórinisi. Al, Ánuranymyz – erkindik pen eldiktiń úni. Táýelsizdiktiń osy úsh simvoly halqymyzǵa erekshe rýh beredi», – dep, ulttyq nyshandardyń mańyzdylyǵyna erekshe toqtalǵan bolatyn.
Táýelsizdigimizdiń tumaryna ainalǵan rámizderimizdi qasterleý, olarǵa qurmetpen qaraý – árbir qazaqstandyqtyń qasietti paryzy. Barshańyzǵa zor densaýlyq, otbasylaryńyzǵa amandyq pen baq-bereke tileimin. Óńirimiz órkendep, elimiz gúldene bersin!», - dep sózin aiaqtady Marat Sultanǵaziev.
Aita keteiik, jalpy oblys boiynsha 300-den astam merekelik is-shara ótip, 23.000-nan astam qatysýshy jinaldy. Oblystyń ár aýdanynda tý kóterilip, ánuran shyrqaldy.
