Almaty áýejaiynyń jelilik politsiia bóliminiń bastyǵy er adamnyń qatań tekserý aimaǵyna pyshaqty qalai alyp kirgeni týraly aitty, dep habarlaidy Dalanews.kz Orda.kz-ke siltep.
Jelilik politsiia bóliminiń bastyǵy, podpolkovnik Rýslan Ózbekov atalǵan jaǵdaiǵa qatysty túsinikteme berdi.
“Áýejai aýmaǵyna pyshaqpen kirý múmkin emes, óitkeni tekserý qyzmeti qatań jumys isteidi. Tergeý barysynda qylmyskerdiń qarýdy qalai alyp kirgeni anyqtalatyn bolady”, – dedi ol.
Qazirgi ýaqytta quqyq qorǵaý organdary kúdiktiniń tekserý aimaǵyna qarýdy qalai aparyp, áýejai qyzmetkerine qaýip tóndirgenin tekserýde.
“67 jastaǵy er adam oqiǵa ornynda ustaldy. Ol birden politsiia bólimine jetkizilip, qazirgi tańda ýaqytsha ustaý izoliatorynda otyr. Qylmystyq is qozǵaldy”, – dep málimdedi politsiia ókili.
Bul oqiǵa Almaty áýejaiyndaǵy qaýipsizdik sharalaryna qatysty kóptegen suraq týyndatty. Tergeý nátijesinde tekserý júiesindegi olqylyqtar anyqtalsa, tiisti sharalar qabyldanýy múmkin.
Eske salaiyq, buǵan deiin Almatyda er adam áýejai qyzmetkerin kepilge alǵanyn jazǵan edik.
Áýejai ókilderiniń sózinshe, oqiǵa búgin, 7 naýryzda áýejaidyń ushý aldyndaǵy tekserý aimaǵynda bolǵan.
Saǵat 11:45 shamasynda ózin jolaýshy retinde tanystyrǵan er adam ishki terminaldaǵy (T1) reis aldyndaǵy tekserý aimaǵyna kelgen. Almaty halyqaralyq áýejaiynyń aviatsiialyq qaýipsizdik qyzmetiniń skrining qyzmetkerleri er adamnan qujattaryn kórsetýdi suraǵan, biraq er adam skrining ofitserin shashynan ustap alyp, pyshaqpen qorqyta bastaǵan.
7 minýttan keiin áýejaidyń jelilik politsiia bóliminiń (LPD) qyzmetkerleri jáne Almaty halyqaralyq áýejaiynyń aviatsiialyq qaýipsizdik qyzmetkerleri er adamnyń pyshaǵyn tartyp alǵan.
Qazirgi ýaqytta er adam politsiia bóliminde, quqyq qorǵaý qyzmetkerleri oqiǵanyń mán-jaiyn anyqtap jatyr.
