الماتى اۋەجايىنىڭ جەلىلىك پوليسيا ءبولىمىنىڭ باستىعى ەر ادامنىڭ قاتاڭ تەكسەرۋ ايماعىنا پىشاقتى قالاي الىپ كىرگەنى تۋرالى ايتتى، دەپ حابارلايدى Dalanews.kz Orda.kz-كە سىلتەپ.
جەلىلىك پوليسيا ءبولىمىنىڭ باستىعى، پودپولكوۆنيك رۋسلان وزبەكوۆ اتالعان جاعدايعا قاتىستى تۇسىنىكتەمە بەردى.
“اۋەجاي اۋماعىنا پىشاقپەن كىرۋ مۇمكىن ەمەس، ويتكەنى تەكسەرۋ قىزمەتى قاتاڭ جۇمىس ىستەيدى. تەرگەۋ بارىسىندا قىلمىسكەردىڭ قارۋدى قالاي الىپ كىرگەنى انىقتالاتىن بولادى”، – دەدى ول.
قازىرگى ۋاقىتتا قۇقىق قورعاۋ ورگاندارى كۇدىكتىنىڭ تەكسەرۋ ايماعىنا قارۋدى قالاي اپارىپ، اۋەجاي قىزمەتكەرىنە ءقاۋىپ توندىرگەنىن تەكسەرۋدە.
“67 جاستاعى ەر ادام وقيعا ورنىندا ۇستالدى. ول بىردەن پوليسيا بولىمىنە جەتكىزىلىپ، قازىرگى تاڭدا ۋاقىتشا ۇستاۋ يزولياتورىندا وتىر. قىلمىستىق ءىس قوزعالدى”، – دەپ مالىمدەدى پوليسيا وكىلى.
بۇل وقيعا الماتى اۋەجايىنداعى قاۋىپسىزدىك شارالارىنا قاتىستى كوپتەگەن سۇراق تۋىنداتتى. تەرگەۋ ناتيجەسىندە تەكسەرۋ جۇيەسىندەگى ولقىلىقتار انىقتالسا، ءتيىستى شارالار قابىلدانۋى مۇمكىن.
ەسكە سالايىق، بۇعان دەيىن الماتىدا ەر ادام اۋەجاي قىزمەتكەرىن كەپىلگە العانىن جازعان ەدىك.
اۋەجاي وكىلدەرىنىڭ سوزىنشە، وقيعا بۇگىن، 7 ناۋرىزدا اۋەجايدىڭ ۇشۋ الدىنداعى تەكسەرۋ ايماعىندا بولعان.
ساعات 11:45 شاماسىندا ءوزىن جولاۋشى رەتىندە تانىستىرعان ەر ادام ىشكى تەرمينالداعى (ت1) رەيس الدىنداعى تەكسەرۋ ايماعىنا كەلگەن. الماتى حالىقارالىق اۋەجايىنىڭ اۆياسيالىق قاۋىپسىزدىك قىزمەتىنىڭ سكرينينگ قىزمەتكەرلەرى ەر ادامنان قۇجاتتارىن كورسەتۋدى سۇراعان، ءبىراق ەر ادام سكرينينگ وفيسەرىن شاشىنان ۇستاپ الىپ، پىشاقپەن قورقىتا باستاعان.
7 مينۋتتان كەيىن اۋەجايدىڭ جەلىلىك پوليسيا ءبولىمىنىڭ (LPD) قىزمەتكەرلەرى جانە الماتى حالىقارالىق اۋەجايىنىڭ اۆياسيالىق قاۋىپسىزدىك قىزمەتكەرلەرى ەر ادامنىڭ پىشاعىن تارتىپ العان.
قازىرگى ۋاقىتتا ەر ادام پوليسيا بولىمىندە، قۇقىق قورعاۋ قىزمەتكەرلەرى وقيعانىڭ ءمان-جايىن انىقتاپ جاتىر.
