Almaty ákimi Erbolat Dosaev Memleket basshysynyń tapsyrmasymen tótenshe jaǵdaida kórsetken erligi men janqiiarlyǵy úshin Ábdiraiym Musa Sairanbaiulyn «Erligi úshin» medalimen marapattady, dep habarlaidy Dalanews.kz
Sondai-aq, Musa Ábdiraiymǵa aqshalai syiaqy tabystaldy.
52 jastaǵy azamat jolaýshy retinde Almaty halyqaralyq áýejaiynyń ushýǵa deiingi tekserý aimaǵyna kirgen qylmyskerdiń qolyndaǵy pyshaǵyn tartyp aldy. Batyldyq pen shapshańdyqtyń arqasynda ol áýejai qyzmetkeriniń ómirin saqtap qaldy.
«Qazaqstan Prezidenti Qasym-Jomart Kemelulyna orasan zor kóńil bólip, qurmet kórsetkeni úshin shyn júrekten alǵysymdy bildiremin. Bizdiń elde árqashan beibit aspan, kelisim men órkendeý bolsyn!», - dedi Musa Ábdiraiym.
Eske salaiyq, 7 naýryz kúni Saǵat 11:45 shamasynda Almaty áýejaiynyń ushý aldyndaǵy tekserý aimaǵynda ózin jolaýshy retinde tanystyrǵan er adam kelgen. Almaty halyqaralyq áýejaiynyń aviatsiialyq qaýipsizdik qyzmetiniń skrining qyzmetkerleri er adamnan qujattaryn kórsetýdi suraǵan, biraq er adam skrining ofitserin shashynan ustap alyp, pyshaqpen qorqyta bastaǵan. Alaida batyl azamattyń jedel áreketi jaǵdaidy baqylaýǵa alýǵa kómektesti.
Belgili bolǵandai, qylmyskerdi ustaýǵa kómektesken – Musa Sairambaiuly Ábdiraiymov. Ol 1973 jyly Túrkistan oblysy, Túlkibas aýdany, Kúmisbastaý aýylynda dúniege kelgen. Kásibi sportpen ainalysqan, búginde bes balanyń ákesi. Sonymen qatar ánshi Baǵlan Ábdiraiymovtyń aǵasy.
Oqiǵa kýágerleri Musa Ábdiraiymovtyń erligine tánti boldy. Ol qaýipke qaramastan, qylmyskerdiń pyshaǵyn tartyp alyp, áýejai qyzmetkerin qutqarǵan. Áleýmettik jelide “bul – naǵyz erlik” degen pikirler kóbeiip, onyń batyldyǵy keńinen talqylanýda.
Memleket basshysy Qasym-Jomart Toqaev Musa Ábdiraiymovtyń batyldyǵyn erekshe atap ótip, ony memlekettik marapatqa usynýdy tapsyrdy. Bul týraly Prezidenttiń baspasóz hatshysy Rýslan Jeldibai habarlady.
