Almaty áýejaiynda bolǵan oqiǵaǵa qatysty kólik politsiiasy departamenti pikir bildirdi, dep habarlaidy Dalanews.kz.
Buǵan deiin Almaty áýejaiynda belgisiz er adam tekserý bóliminiń qyzmetkerine pyshaqpen qaýip tóndirip, ony kepilge alǵan bolatyn.
Kólik politsiiasy departamentiniń baspasóz qyzmetiniń habarlaýynsha, 7 naýryz kúni áýejaida tekserý aimaǵyna ótken er adam inspektordy shashynan tartyp, asúi pyshaǵymen qorqytqan.
“Quqyqbuzýshy zalalsyzdandyrylyp, politsiia bólimshesine jetkizildi. Atalǵan derek boiynsha qylmystyq is qozǵaldy. Kúdikti ýaqytsha ustaý izoliatoryna qamaldy. Tergeý amaldary júrgizilýde”, – delingen resmi habarlamada.
Sondai-aq kúdiktiniń jasy 67-de ekeni belgili boldy.
Aita keteiik, Almaty áýejaiynda qylmyskerdi ustaýǵa kómektesken er adam memlekettik nagradaǵa usynylady.
Bul týraly Prezidenttiń baspasóz hatshysy Rýslan Jeldibai jelidegi paraqshasynda osylai dep jazdy.
“Prezident qylmyskerdiń sýyq qarýyn tartyp alyp, ustaýǵa kómektesken er adamnyń batyldyǵyn erekshe atap ótip, atalǵan azamatty memlekettik nagradaǵa usynýdy tapsyrdy” dedi baspasóz hatshysy.
Kozachkov telegram-arnasynyń jazýynsha, ol politsiia qyzmetkeri emes – oqiǵa ornyna kezdeisoq tap bolǵan jáne [qyzmetkerdi bosatyp], ózin kepildikke alýdy usynǵan. Videoda onyń pyshaqty úshkir jaǵynan jyldam tartyp alǵany kórinedi.
Eske salaiyq, buǵan deiin Almatyda er adam áýejai qyzmetkerin kepilge alǵanyn jazǵan edik.
Áýejai ókilderiniń sózinshe, oqiǵa búgin, 7 naýryzda áýejaidyń ushý aldyndaǵy tekserý aimaǵynda bolǵan.
Saǵat 11:45 shamasynda ózin jolaýshy retinde tanystyrǵan er adam ishki terminaldaǵy (T1) reis aldyndaǵy tekserý aimaǵyna kelgen. Almaty halyqaralyq áýejaiynyń aviatsiialyq qaýipsizdik qyzmetiniń skrining qyzmetkerleri er adamnan qujattaryn kórsetýdi suraǵan, biraq er adam skrining ofitserin shashynan ustap alyp, pyshaqpen qorqyta bastaǵan.
7 minýttan keiin áýejaidyń jelilik politsiia bóliminiń (LPD) qyzmetkerleri jáne Almaty halyqaralyq áýejaiynyń aviatsiialyq qaýipsizdik qyzmetkerleri er adamnyń pyshaǵyn tartyp alǵan.
Qazirgi ýaqytta er adam politsiia bóliminde, quqyq qorǵaý qyzmetkerleri oqiǵanyń mán-jaiyn anyqtap jatyr.
