الماتى اۋەجايىندا بولعان وقيعاعا قاتىستى كولىك پوليسياسى دەپارتامەنتى پىكىر ءبىلدىردى، دەپ حابارلايدى Dalanews.kz.
بۇعان دەيىن الماتى اۋەجايىندا بەلگىسىز ەر ادام تەكسەرۋ ءبولىمىنىڭ قىزمەتكەرىنە پىشاقپەن ءقاۋىپ ءتوندىرىپ، ونى كەپىلگە العان بولاتىن.
كولىك پوليسياسى دەپارتامەنتىنىڭ باسپا ءسوز قىزمەتىنىڭ حابارلاۋىنشا، 7 ناۋرىز كۇنى اۋەجايدا تەكسەرۋ ايماعىنا وتكەن ەر ادام ينسپەكتوردى شاشىنان تارتىپ، ءاسۇي پىشاعىمەن قورقىتقان.
“قۇقىقبۇزۋشى زالالسىزداندىرىلىپ، پوليسيا بولىمشەسىنە جەتكىزىلدى. اتالعان دەرەك بويىنشا قىلمىستىق ءىس قوزعالدى. كۇدىكتى ۋاقىتشا ۇستاۋ يزولياتورىنا قامالدى. تەرگەۋ امالدارى جۇرگىزىلۋدە”، – دەلىنگەن رەسمي حابارلامادا.
سونداي-اق كۇدىكتىنىڭ جاسى 67-دە ەكەنى بەلگىلى بولدى.
ايتا كەتەيىك، الماتى اۋەجايىندا قىلمىسكەردى ۇستاۋعا كومەكتەسكەن ەر ادام مەملەكەتتىك ناگراداعا ۇسىنىلادى.
بۇل تۋرالى پرەزيدەنتتىڭ باسپا ءسوز حاتشىسى رۋسلان جەلدىباي جەلىدەگى پاراقشاسىندا وسىلاي دەپ جازدى.
“پرەزيدەنت قىلمىسكەردىڭ سۋىق قارۋىن تارتىپ الىپ، ۇستاۋعا كومەكتەسكەن ەر ادامنىڭ باتىلدىعىن ەرەكشە اتاپ ءوتىپ، اتالعان ازاماتتى مەملەكەتتىك ناگراداعا ۇسىنۋدى تاپسىردى” دەدى باسپا ءسوز حاتشىسى.
كوزاچكوۆ تەلەگرام-ارناسىنىڭ جازۋىنشا، ول پوليسيا قىزمەتكەرى ەمەس – وقيعا ورنىنا كەزدەيسوق تاپ بولعان جانە [قىزمەتكەردى بوساتىپ]، ءوزىن كەپىلدىككە الۋدى ۇسىنعان. ۆيدەودا ونىڭ پىشاقتى ۇشكىر جاعىنان جىلدام تارتىپ العانى كورىنەدى.
ەسكە سالايىق، بۇعان دەيىن الماتىدا ەر ادام اۋەجاي قىزمەتكەرىن كەپىلگە العانىن جازعان ەدىك.
اۋەجاي وكىلدەرىنىڭ سوزىنشە، وقيعا بۇگىن، 7 ناۋرىزدا اۋەجايدىڭ ۇشۋ الدىنداعى تەكسەرۋ ايماعىندا بولعان.
ساعات 11:45 شاماسىندا ءوزىن جولاۋشى رەتىندە تانىستىرعان ەر ادام ىشكى تەرمينالداعى (ت1) رەيس الدىنداعى تەكسەرۋ ايماعىنا كەلگەن. الماتى حالىقارالىق اۋەجايىنىڭ اۆياسيالىق قاۋىپسىزدىك قىزمەتىنىڭ سكرينينگ قىزمەتكەرلەرى ەر ادامنان قۇجاتتارىن كورسەتۋدى سۇراعان، ءبىراق ەر ادام سكرينينگ وفيسەرىن شاشىنان ۇستاپ الىپ، پىشاقپەن قورقىتا باستاعان.
7 مينۋتتان كەيىن اۋەجايدىڭ جەلىلىك پوليسيا ءبولىمىنىڭ (LPD) قىزمەتكەرلەرى جانە الماتى حالىقارالىق اۋەجايىنىڭ اۆياسيالىق قاۋىپسىزدىك قىزمەتكەرلەرى ەر ادامنىڭ پىشاعىن تارتىپ العان.
قازىرگى ۋاقىتتا ەر ادام پوليسيا بولىمىندە، قۇقىق قورعاۋ قىزمەتكەرلەرى وقيعانىڭ ءمان-جايىن انىقتاپ جاتىر.
