Almaty qalasynyń ákimi Erbolat Dosaevtyń tapsyrmasymen 2024 jyly qaladaǵy komýnaldyq turǵyn úı qorynan 2000 jaldamaly páter bólinip, áleýmettik osal top ókilderine tapsyryldy, – dep habarlaıdy Dalanews.kz Almaty qalasy ákiminiń baspasóz qyzmetine silteme jasap.
Qala ákiminiń bastamasymen bólingen baspanany jetim balalar, ardagerler, 1 jáne 2 top múgedekteri, tolyq emes jáne kópbalaly otbasylardyń músheleri, zeınetkerler jáne múgedek balalardy tárbıelep otyrǵan ata-analar – barlyǵy 201 adam aldy.
Almatynyń komýnaldyq ınfraqurylymdy damytý basqarmasy basshysynyń orynbasary Ǵalymjan Ábdishúkiruly qonys toıyn toılap jatqan turǵyndardy quttyqtap, olarǵa tehnıkalyq máselelerdi egjeı-tegjeıli túsindirdi.
– Bul men úshin óte mańyzdy sát. Men jańa, zamanaýı úıden páter alǵanyma qýanyshtymyn. Baspanany 2013 jyldan beri kúttim. Buǵan deıin jekemenshik sektorda úı jaldap turatynmyn. Úı alýǵa múmkindik beretin qoldanystaǵy memlekettik baǵdarlamalarǵa óte rızamyn, – dep kezekte turǵandardyń biri Zýlfıra Halıýlova qýanyshyn bólisti.
Birinshi jartyjyldyqta Naýryzbaı jáne Medeý aýdandarynda 1080 otbasy jaldamaly turǵyn úı aldy.
Qarasha aıynda taǵy 920 almatylyqqa kilt tabystalyp, olar Naýryzbaı aýdanyndaǵy jańa páterlerge qonystanady dep josparlanyp otyr.
Bólingen 2000 páterdiń 400-i jetim balalarǵa, 250-i erekshe qajettiligi bar adamdar men múgedek balalardy tárbıelep otyrǵan otbasylarǵa jáne 1350-i basqa sanattarǵa (ardagerler, kópbalaly otbasylar, tolyq emes otbasylar jáne t.b.) berildi.
Sonymen qatar, bıyl jumys isteıtin almatylyq jastar úshin 2100 jaldamaly páter berildi. Jumys isteıtin jastarǵa arnalǵan satyp alý quqyǵynsyz jaldamaly turǵyn úı baǵdarlamasy jastardy qoldaýǵa jáne jeke baspana satyp alýǵa yntalandyrýǵa baǵyttalǵan.
Jumys isteıtin jastarǵa arnalǵan jaldaý shartynda aı saıynǵy tólem mólsheri 7-den 15 myń teńgege deıin belgilengen, satyp alý quqyǵy men jaldaý merzimin uzartý múmkindigi qarastyrylmaǵan. Buǵan qosa, jumys isteıtin jastarǵa arnalǵan jaldamaly turǵyn úıdi jaldaýshylar úsh jyl ishinde keıinnen ekinshi deńgeıli bankterden ıpoteka arqyly baspana satyp alý úshin depozıtke qarajat jınaýǵa mindetti.
