Almaty qalasynyń ákimi Darhan Satybaldy Jetisý aýdanyndaǵy «Dragon City» turǵyn úi kesheniniń turǵyndarymen kezdesti. Kezdesý barysynda turǵyndar jerasty turaǵyn zańsyz qaita satý, qazandyqtyń jumysy jáne jerasty úi-jaiynda transformatorly qosalqy stantsiiany ornalastyrý siiaqty birqatar ózekti máselelerdi kóterdi, dep habarlaidy Dalanews.kz
Turǵyndar bastapqy joba boiynsha páterler parkingpen birge satylǵanyn aitty. Keiinirek sharttar ózgerip, kólik oryndarynyń quny 3-ten 10 million teńgege deiin ósken, sodan keiin úi-jailar tolyǵymen kommertsiiaǵa ainalǵan. Turǵyndardyń pikirinshe, bul bastapqyda oilastyrylǵan syzba bolǵan.
Darhan Satybaldy jaýapty organdarǵa osyndai sheshimderdiń qalai qabyldanǵanyn, kim ruqsat berip, qujattarǵa kim qol qoiǵanyn anyqtaýdy tapsyrdy. Ol budan bylai bul másele óziniń jeke baqylaýynda bolatynyn aitty.
«Is-qimyl algoritmi Ekonomikalyq tergeý departamentimen, prokýratýra, TJ jáne basqa da qyzmettermen birlesip ázirlenetin bolady. Qajet bolsa, transformatorlyq qosalqy stantsiiany aýystyramyz. Eń bastysy - keshenniń 2 jarym myńǵa jýyq turǵynnyń qaýipsizdigi men ómirine tónetin kez kelgen qaterdiń aldyn alý», - dedi ákim.
Qala basshysy jylytý maýsymynda qazandyqqa qyzmet kórsetýdi vedomstvolyq baǵynysty uiym óz moinyna alatynyn atap ótti. Ol qysta úzilissiz jumys isteýine múmkindik beretinin, al kelesi jyly nysan biýdjet esebinen jańǵyrtylatynyn aitty.
Ákim transformatorly qosalqy stantsiiany jerasty úi-jaiyna ornalastyrýǵa qatysty aldymen qaýipsizdik sharalaryn pysyqtaýdy tapsyrdy.
Turǵyndar abattandyrý máselelerin de kóterdi. Ákimniń tapsyrmasy boiynsha aýdanda jol belgileri, «kórinbeitin politseiler» jáne beinebaqylaý kamerasy ornatylady. Budan basqa, «Halyq qatysatyn biýdjet» baǵdarlamasynyń tetigi arqyly balalar oiyn alańyn salý máselesi de qaralady.
