Almaty qalasynyń ákimi Darhan Satybaldy Naýryzbai jáne Bostandyq aýdandarynda ornalasqan sýmen jabdyqtaý nysandaryn aralap, qala turǵyndaryn sapaly aýyzsýmen qamtamasyz etýge baǵyttalǵan mańyzdy infraqurylymdyq jobalardyń júzege asý barysymen tanysty,- dep habarlaidy Dalanews.kz
Aldymen ákim Qaraǵaily shaǵynaýdanynda boi kóterip jatqan sý tartý jáne sý tazartý keshenine bardy. Bul nysan Naýryzbai aýdanynyń halyq tyǵyz qonystanǵan aýmaǵyn sapaly ári turaqty aýyzsýmen qamtýǵa arnalǵan. Keshen táýligine 15 myń tekshe metr sý óndirýge qaýqarly. Qazirgi tańda qurylys jumystary tolyq aiaqtalyp, reagentter men súzgileý jabdyqtaryn ornatý, avtomattandyrý jáne basqarý júielerin iske qosý-retteý sharalary júrip jatyr.
Darhan Satybaldy nysannyń paidalanýǵa berilý merzimine qatysty birqatar eskertý aityp, týyndaǵan máselelerdi jedel sheshýdi tapsyrdy.
Budan keiin qala basshysy Asqarov kóshesinde júrgiziletin sý qubyrlaryn jańartý jáne sorǵy stantsiiasyn qaita qurý jumystarynyń jobasymen tanysty. Joba aiasynda ekinshi kóterilimdegi jańa sorǵy stantsiiasy salynyp, taza sýǵa arnalǵan rezervýarlar qaita jóndeledi, eskirgen injenerlik jeliler tolyq aýystyrylyp, júie zamanaýi talaptarǵa sai jańǵyrtylady. Bul nysan iske qosylǵan soń 15 myńnan astam turǵyn men áleýmettik mekemelerdi úzdiksiz ári senimdi aýyzsýmen qamtamasyz etedi. Qurylys shilde aiynda bastalady.
Qala ákiminiń jumys sapary Nur Alataý shaǵynaýdanynda ornalasqan «Rezervtik kól» gidrotehnikalyq nysanynda aiaqtaldy. Buryn 300 myń tekshe metr kóleminde sý jinaqtaýǵa arnalǵan bul sý qoimasy qazirgi tańda tehnikalyq aqaýlar men apat qaýpine bailanysty jumysyn toqtatqan. Qazirgi tańda nysandy kúrdeli jóndeýden ótkizý qajet.
Osy strategiialyq mańyzdy aýmaqty tiimdi paidalaný maqsatynda munda sý tazartýǵa arnalǵan membranalyq qondyrǵylar ornatý, kólemi keminde 6 000 tekshe metr bolatyn jańa taza sý rezervýarlaryn salý jáne qoldanystaǵy infraqurylymdy qaita qalpyna keltirý máselesi qarastyrylyp jatyr. Sonymen qatar, sýdy zalalsyzdandyrý júiesin engizip, nysan aýmaǵynyń bir bóligin qalanyń balansyna qaitaryp, onda turǵyndar úshin saiabaq nemese skver syndy jasyl aimaq qurý josparlanǵan.
«Turaqty sýmen qamtý qala turǵyndarynyń jailylyǵy men qaýipsizdigine tikelei áser etetin mańyzdy faktor. Biz turǵyndardy sapaly sýmen jáne senimdi injenerlik infraqurylymmen qamtamasyz etýge mindettimiz. Barlyq jumys ýaqytynda, keshiktirilmei aiaqtalýǵa tiis», — dedi Darhan Satybaldy.
Jumys saparynyń qorytyndysy boiynsha ákim barlyq jaýapty mekemege jumystardyń úilesimdi júrgizilýin qamtamasyz etip, jańa qýattardy iske qosýǵa kedergi keltirip otyrǵan barlyq túitkildi sheshýdi jáne retteý jumystarynyń qarqynyn arttyrýdy tapsyrdy. Ol zamanaýi ári senimdi sýmen qamtý júiesin damytý qalanyń infraqurylymdyq saiasatynyń basty basymdyqtarynyń biri ekenin atap ótti.
