Almaty qalasynyń ákimi Darhan Satybaldy kezekti jumys sapary aiasynda kárizdik tazartý qurylystaryn (KTQ) jáne «Sorbulaq» shaiyndy sýlar jinaǵyshyn aralap kórip, nysandardyń qazirgi jai-kúiimen jáne olardy jańartý men tazartý júieleriniń tiimdiligin arttyrýǵa baǵyttalǵan sharalarmen tanysty,- dep habarlaidy Dalanews.kz
Alǵashqy núkte Ile aýdanyndaǵy Jápek Batyr aýylynda ornalasqan aeratsiia stantsiiasy boldy. Munda Almaty men qala mańyndaǵy eldi mekenderden keletin shaiyndy sýlar mehanikalyqtan bastap biologiialyqqa deiingi kóp satyly tazartýdan ótedi. Nysan 1992 jyly salynǵan jáne búgingi kúni qalalyq infraqurylymnyń mańyzdy býyny bolyp sanalady. Jobalyq qýaty táýligine 640 myń tekshe metr, qazirgi júkteme shamamen 450 myń tekshe metr.
Sapar barysynda qala ákimi tazartý qýattaryn jańǵyrtý qarqyny qala qurylysy men ónerkásiptiń damýyna sai bolýy tiis ekenin atap ótti.
«Shaiyndy sýlardy tazartý sapasy qalanyń ekologiialyq qaýipsizdigine jáne turǵyndardyń densaýlyǵyna tikelei áser etedi. Munda tek qoldanystaǵy qýattardy ustap turý ǵana emes, tazartý standarttaryn kóterý de mańyzdy», — dedi Darhan Satybaldy.
Tazartýdan ótken sý 1973 jyldan beri shaiyndy sýlardy jinap, saqtaýǵa arnalǵan óńirdegi eń iri infraqurylym nysany «Sorbulaq» jinaǵyshyna quiylady. Sý aidynynyń aýdany 58 sharshy shaqyrym, tereńdigi 25 metrge deiin jetedi.
«Sorbulaqtyń» jaǵdaiyn baqylaý aiasynda nysanda injenerlik-gidrologiialyq zertteýler júrgizilýde. Bekitilgen tehnologiialyq reglament pen paidalaný erejelerine sáikes «Almaty Sý» MKK mamandary kún saiyn sý deńgeiin ólshep, turaqty ekologiialyq jáne himiialyq baqylaý júrgizedi. Sondai-aq, nysanda sý deńgeiin retteitin jáne sý tasqyny qaýpiniń aldyn alatyn bógetter, sý bólgish jáne gidrotehnikalyq qurylystar bar.
Sapar qorytyndysy boiynsha Darhan Satybaldy tazartý qurylystaryn jańǵyrtý jáne jinaǵyshty senimdi paidalaný boiynsha jobalyq sheshimderdi baqylaýǵa alýdy tapsyrdy. Ásirese, tazartý sapasyna, súzý deńgeiine jáne halyq sanynyń artýy men qalalyq aglomeratsiianyń keńeiýi jaǵdaiynda júktemeniń ósýine daiyndyqqa erekshe nazar aýdarýdy mindettedi.
