Almaty qalasynyń ákimi Darhan Satybaldy Jetisý aýdanynda birqatar ózekti másele talqylanǵan jumys jıynyn ótkizdi. Keńeske aýdan ákimdigi, salalyq basqarmalar, komýnaldyq qyzmetter men tıisti mekemelerdiń ókilderi qatysty,- dep habarlaıdy Dalanews.kz
Kún tártibindegi basty máselelerdiń biri Soltústik aınalma jol boıyndaǵy ruqsatsyz saýda oryndary boldy. Atap aıtqanda, osy jol men Jumabaev kóshesiniń boıynan beıbereket saýda núkteleri kóptep anyqtalǵan. Aýdandyq polısıa ókilderiniń málimetinshe, bıyl jyl basynan beri osy fakti boıynsha 756 ákimshilik hattama toltyrylyp, jalpy somasy 4 mıllıon teńge kóleminde aıyppul salynǵan. Bul baǵyttaǵy reıdtik sharalar jalǵasyp keledi.
Jıyn barysynda bazar aýmaqtaryndaǵy órt qaýipsizdigi de jeke qaraldy. 2022 jyldyń qarashasynan beri bul aýmaqta birneshe órt oqıǵasy tirkelgen. Oǵan elektr symdarynyń qysqa tuıyqtalýy, alǵashqy órt sóndirý quraldarynyń bolmaýy jáne qasaqana órt qoıý sebep bolǵan. Qalalyq tótenshe jaǵdaılar departamentiniń ókilderi nysan ıelerine eskertý únemi tabystalatynyn, al zańbuzýshylyqtar boıynsha materıaldar sotqa joldanatynyn habarlady.
«Eger jaǵdaı ózgermeı, nátıje shyqpasa, onda budan da qatań sharalar qabyldanýy tıis», – dedi Almaty ákimi TJD ókilderine qarata sóılegen sózinde.
Keńeste ınjenerlik jelilerdiń qurylysy, olardy komýnaldyq menshikke ótkizý, jol jóndeý jumystary, sondaı-aq «Halyq qatysatyn búdjet» baǵdarlamasy aıasynda júzege asyrylyp jatqan jobalardyń sapasy sóz boldy. Sonymen qatar, Jetisý aýdanyndaǵy densaýlyq saqtaý jáne bilim berý mekemeleriniń jaı-kúıi talqylandy.
Qala basshysy bastalǵan barlyq jumystyń der kezinde aıaqtalýy qajettigin qatań eskertti.
«Eń bastysy, jaryq, sý, gaz sekildi ár adam kúndelikti tutynatyn negizgi qajettilikterden eshkim tapshylyq kórmeýi kerek. Sondyqtan birde-bir joba sozylyp ketpeýi tıis. Eger bir isti qolǵa alsańyzdar, sońyna deıin jetkizińizder. Barlyq joba 1 qyrkúıekke deıin aıaqtalýy qajet», – dedi Darhan Satybaldy.
Almaty ákimi jıyn aıasynda Jetisý aýdanynyń turǵyndaryn qabyldap, olardy tolǵandyrǵan túıtkilderdi tyńdady. Atap aıtqanda, turǵyn úı qoryn jańǵyrtý, jer telimine jáne Ýssýrııskaıa kóshesindegi jeke sektordy ortalyq káriz júıesine qosý jaıy talqylandy. Árbir ótinish boıynsha naqty jaýap berilip, sheshý joldary men oryndalý merzimi belgilendi.
