Almaty qalasy ákimi Erbolat Dosaev osy jyldyń tamyz aıynda qyzmetine kirisken Germanıa Federatıvtik Respýblıkasynyń Almaty qalasyndaǵy jańa Bas konsýly Mattıas Kıslermen kezdesti, – dep habarlaıdy Dalanews.kz Almaty qalasy ákiminiń baspasóz qyzmetine silteme jasap.
Kezdesý barysynda saýda-ekonomıkalyq jáne mádenı-gýmanıtarlyq salalardaǵy yntymaqtastyqty damytý perspektıvalary, sondaı-aq óńdeý ónerkásibine, densaýlyq saqtaý, ekologıa jáne sıfrlandyrý salalaryna ınvestısıa men tehnologıa tartý jaıy talqylandy.
Atap aıtqanda, Almatynyń ındýstrıalyq aımaǵynda Germanıanyń ınvestory júzege asyratyn jalpy quny 75 mlrd teńge bolatyn jáne 300 jumys ornyn ashatyn jylý oqshaýlaǵysh materıaldar shyǵaratyn zaýyt qurylysy jónindegi máseleler qaraldy.
Sonymen qatar, energetıka salasyna arnalǵan jabdyqtar men komponentter óndirýmen aınalysatyn jetekshi transulttyq kompanıalardyń biriniń aımaqtyq servıs habyn ornalastyrý múmkindigi talqylandy. Bul hab Ortalyq Azıa men Kavkaz elderindegi salalyq kompanıalarǵa servıstik qoldaý kórsetedi dep boljanýda.
Jalpy, eki el arasyndaǵy taýar aınalymy dástúrli túrde joǵary deńgeıde saqtalyp keledi: bıylǵy 9 aıda bul kórsetkish 1 mlrd AQSH dollarynan asty. Búginde Almatyda nemis kapıtalynyń qatysýymen 396 kásiporyn nemese Qazaqstanda ornalasqan barlyq kásiporynnyń úshten biri jumys isteıdi.
Kezdesý qorytyndysy boıynsha taraptar ózara qarym-qatynasty nyǵaıtýǵa ýaǵdalasty jáne birqatar birlesken jobany iske asyrýǵa daıyn ekendikterin bildirdi.
