Almaty qalasy ákimdigi kommýnaldyq qyzmet tarifiniń qymbattaýyna bailanysty halyqtyń áleýmettik osal sanatyna ótemaqy tóleýdi jalǵastyrady. Bul týraly Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov aitty, – dep habarlaidy Dalanews.kz.
– Kommýnaldyq infraqurylymnyń eskirýine bailanysty tarifti kóterýdiń qajettiligi bar ekenin túsinemiz, biraq Almaty ákimdigi úshin halyqtyń áleýmettik osal sanattaryn qoldaý árqashan basty nazarda, – dedi Baýyrjan Jaýbasov ÓKQ brifinginde.
Basqarma basshysy 2023 jyldyń shildesinen bastap qala ákiminiń bastamasymen azamattardyń 9 osal sanaty úshin ótemaqy tólemi esebinen TKSh qyzmetiniń qymbattaýynyń saldaryn teńestirýge baǵyttalǵan jobanyń qolǵa alynǵanyn atady.
Bir jyl ishinde 0,8 AEK mólsherinde ai saiynǵy áleýmettik tólemdi 5,7 mlrd teńge somasyna 140 myńnan astam HÁOT aldy.
– Aldaǵy ýaqytta kommýnaldyq qyzmet baǵasynyń ósýine bailanysty Almaty qalasy ákiminiń tapsyrmasymen HÁOT 9 sanatyna jatatyn kommýnaldyq qyzmet baǵasynyń ósýine bailanysty áleýmettik kómek tóleý jalǵasady, – dedi Jumyspen qamtý jáne áleýmettik baǵdarlamalar basqarmasynyń basshysy.
Almaty máslihaty sheshiminiń tiisti jobasy qarastyrypy jatyr, biyl qyrkúiekte bekitýge engiziledi. Bul ereje 2025 jyldyń 1 sáýirine deiin qoldanylady.
Qazirgi tańda Almatyda osy sanattaǵy 332 885 adam turady. Áleýmettik tólemdi alý úshin atalǵan sanatqa turaqty tirkelýi jáne Almatyda turǵylyqty tirkeýi bolýy, qala ákimdikteriniń jumyspen qamtý jáne áleýmettik baǵdarlamalar bólimderine ótinish berýi jáne sáikestendirý úshin jeke kýálik usynýy qajet.
Kómektiń bul túrin rásimdegenderge ótinish berýdiń qajeti joq.
