– Gaýhar lirikany jaqsy kóredi. Onyń syrǵa toly, muńǵa toly ǵajaiyp ánderi tyńdaǵan jandy elitpei qoimaidy. Sezimge toly syrshyl ánder Gaýhardyń qazaq sahnasyndaǵy ózindik ornyn, án álemindegi ózindik mánerin qalyptastyrdy. Sondyqtan, biz jerlesteri, ánshi qaryndasymyzben qashanda maqtanamyz! – dedi Beisenbai Tasbolatuly.
Ánshi-sazger Gaýhar Álimbekova 1971 jyly Maqtaaral aýdanynda dúniege kelgen. Ol gitarada oinaýdy 9-synypta oqyp júrgende úirengen. Eń alǵash shyǵarǵan áni "Saǵynysh sazy" dep atalady. Alǵash ret Gaýhar jas sazgerlerdiń "Úkili úmit" baiqaýynda kózge túsip, Israil Saparbai, Seken Turysbekov, Murat Qusaiynov aǵalarynyń batasyn aldy.
Ánshiniń repertýaryndaǵy ánderdiń barlyǵy derlik – óz týyndylary. El arasynda Gaýhardyń "Aq bosaǵa", "Kelinge ósiet", "Oralshy, mahabbat", "Kóktemge hat", "Perzent syry", "Kóktemgi jańbyr", "Qyz sezimi" siiaqty ánderi erekshe tanymal. Ásirese, "Aq bosaǵa" men "Kelinge ósiet" kez kelgen toida shyrqalar hit ánge ainaldy. Sondai-aq, "Oralshy, mahabbat" – basqalardan keiinirek jaryqqa shyqsa da, halyqqa birden tanylǵan erekshe án.
Maqtaral aýdany ákiminiń baspasóz qyzmeti
