"Alǵa, qazaq jigitteri!" toby Astanaǵa attandy
Búgin Almatydaǵy Balýan Sholaq atyndaǵy sport kesheni aldynda "EKSPO-2017" kórmesi aiasynda Astanada ótetin kásipqoi boks keshine arnaiy baryp, elimizdiń bylǵary qolǵap sheberlerin qoldaý maqsatynda 50-ge tarta belsendi jastar arnaiy avtokólikpen attandy. Urandary - "Alǵa qazaq, jigitteri!"
Osy sharany uiymdastyrýshy Qydyráli Orazulynyń aitýynsha, Qanat Islam bastaǵan el boksshylaryna qoldaý bildirip, jastardy uiymshyldyqqa, otansúigishtikke úndeý maqsatynda avtokerýen jolǵa shyqqan. Olar jol boiy elimizdiń tarihi nysandaryna toqtap, bul sapardan erekshe estelik qaldyrýdy josparlap otyrǵandaryn aitady.
Erteń saǵat keshki 18.00-de Astanada halyqaralyq kásipqoi boks jarysy "Saryarqa" velotreginde ótedi. Oǵan elimizge tanymal boksshylar qatysady.
Keshtiń basty jekpe-jeginde Qanat Islam kanadalyq Brendon Kýkpen kúsh synasady. Sondai-aq, otandyq basylymnyń málimetterine súiensek, Astanada ótetin boks keshinde Janqosh Turarov, Jánibek Álimhanuly, Meiirim Nursultanov, Rýslan Myrsataev, Áli Ahmedov, Aidos Erbosynuly, Diman Niiazov jáne Nursultan Jańabaev óner kórsetedi.
Jastar toby boks keshinen soń 10 qyrkúiek kúni ótetin "EKSPO-2017" kórmesiniń jabylý saltanatyna da qatysýdy josparlap otyr.
