AMANAT partiiasy fraktsiiasynyń keńeitilgen otyrysynda Premer-ministr Oljas Bektenov tsifrlandyrý men áleýmettik qoldaý júiesindegi protsesterdi ońtailandyrý tiimsiz shyǵyndardy aitarlyqtai qysqartqanyn atap ótti, dep habarlaidy Dalanews.kz.
"Qazir Eńbek ministrligi áleýmettik shyǵyndar boiynsha memleketke túsetin júktemeni ońtailandyrýǵa baǵyttalǵan jumystardy belsendi túrde júrgizip jatyr. Mundaǵy másele shyn máninde kómekke muqtaj adamdarǵa kórsetiletin járdemdi qysqartý emes. Másele – barlyq parametr boiynsha muqtajdar sanatyna jatpaityn adamdardy áleýmettik qoldaý júiesinen shyǵarý týraly bolyp otyr. Qazir biz Tsifrlyq otbasy kartasynyń kómegimen Qazaqstan halqyn 6 sanatqa bóldik. Altynshy sanatqa – úii, avtokóligi, jumysy bar, biraq soǵan qaramastan memleketten áleýmettik tólemder alyp otyrǵan adamdar jatady", – dep atap ótti Premer-ministr.
Qazirgi ýaqytta skoringtik júieni engizý boiynsha pilottyq joba Qaraǵandy men Shymkent qalalarynda júzege asyrylýda, keiin ol elimizdiń barlyq óńirlerine taratylmaq.
"Osy jumystyń nátijesinde 2024 jáne 2025 jyldary biz 280 mlrd teńgeden astam – shamamen 290 mlrd teńgeni únemdei aldyq. Bul negizinen jergilikti biýdjetterdiń qarajaty. Kelesi jyly, bizdiń esebimizshe, taǵy keminde 165 mlrd teńgeni únemdei alamyz. Iaǵni, bul biz basym baǵyttarǵa baǵyttai alatyn aitarlyqtai úlken qarajat. Sizder bilesizder dep oilaimyn, kei óńirlerde berilgen esep boiynsha bir bala bir kúnde 10 úiirmege qatysqan degen derekter boldy. Mundai mysaldar bar. Munyń bári jalǵan kórsetkishter. Qazir biz osy salada tártip ornatyp jatqandyqtan, osyndai únemdeýge qol jetkizip otyrmyz", – dedi Oljas Bektenov.
Úkimet bul baǵyttaǵy jumystardy jalǵastyrady.
