Astana qalasynda jyl saiyn shamamen 200 myń adamǵa áleýmettik kómek beriledi. Bul týraly Jumyspen qamtý jáne áleýmettik qorǵaý basqarmasy basqarma basshysy Ilia Skýb elordanyń Kommýnikatsiialar qyzmetinde ótken brifingte aitty, dep habarlaidy Dalanews.kz.
Onyń sózinshe, áleýmettik kómek zeinetkerlerge, soǵys ardagerlerine, múgedekterge, kópbalaly otbasylarǵa jáne áleýmettik az qamtylǵan azamattarǵa tegin qyzmet kórsetý men aqshalai tólemder túrinde kórsetiledi.
«Áleýmettik qoldaý kórsetýdiń negizgi tetikteriniń biri – ataýly áleýmettik kómek (AÁK). Ol jan basyna shaqqandaǵy ortasha tabysy kedeilik sheginen tómen otbasylarǵa beriledi. AÁK eńbekke qabiletti azamattardy jumyspen qamtýǵa yntalandyryp, kedeilik sheginen shyǵýǵa múmkindik beredi», – dedi Ilia Skýb.
Basqarma basshysy 2025 jyldyń basynan bastap elordada AÁK 1 506 otbasyǵa (7 768 adam) taǵaiyndalǵanyn atap ótti. Onyń ishinde shartsyz kómek 780 otbasyǵa, shartty kómek 887 otbasyǵa berildi. Al 350 otbasyǵa ótinish qanaǵattandyrylmaǵan. Salystyrar bolsaq, 2024 jyly bul kórsetkish 2 614 otbasyny (13 269 adam) qamtyǵan.
«AÁK-ke qosymsha retinde 1 jastan 6 jasqa deiingi balalarǵa ai saiyn 1,5 AEK mólsherinde tólem taǵaiyndalady. 2025 jyly bul tólem 5 898 teńgeni quraidy», – deidi ol.
Ilia Skýbtyń aitýynsha, AÁK alýshylar arasyndaǵy eńbekke ornalasý úlesi 65,7%-dy qurap otyr. Bul josparǵa tolyq sáikes keledi. Jyl saiyn kórsetkishtiń tómendeýi – eńbekpen qamtý sharalaryn iske asyrý jáne jeke kásip ashýǵa jaǵdai jasaýdyń nátijesi.
Sonymen qatar, AÁK júiesin jetildirý úshin birqatar tsifrlyq sheshim engizilgen. Máselen, ýchaskelik komissiialardyń jumysyn jeńildetetin FSM Social mobildi qosymshasy iske qosyldy. Ol tekserý rásimderin jedeldetip, derekterdiń ashyqtyǵyn qamtamasyz etedi. Budan bólek, 2023 jyldan beri qoldanylyp kele jatqan Tsifrlyq otbasy kartasy azamattardyń ál-aýqat deńgeiin 84 kórsetkish boiynsha baǵalaidy.
«Áleýmettik qoldaýdyń basty maqsaty – tek kómek kórsetý ǵana emes, azamattardy jumyspen qamtýǵa tartyp, kedeilik sheńberinen shyǵarý. Jańa tsifrlyq sheshimder bizge áleýmettik saiasatty ádiletti ári tiimdi júrgizýge múmkindik beredi», – dedi basqarma basshysy.
