Qazaqstan qarjygerleri qaýymdastyǵy Aqmola oblystyq prokýratýrasynyń UQT isine bailanysty tórt qazaqstandyq bank qyzmetkerleriniń aty atalǵanyna orai birlesken málimdeme taratty, dep habarlaidy Dalanews.kz.
Eske salaiyq, 2 qyrkúiekte Aqmola oblystyq prokýratýrasy áleýmettik osal toptaǵy azamattardy urlap, olardyń atyna iri kólemde nesie rásimdegen uiymdasqan qylmystyq toptyń isin tergeýdi aiaqtaǵanyn habarlaǵan edi. Tergeý málimetinshe, UQT quramynda eldiń birneshe aimaǵynan 25 adam bolǵan, olardyń arasynda bank qyzmetkerleri de bar delingen.
Bankterdiń aitýynsha, prokýratýradan olardyń qazirgi nemese burynǵy qyzmetkerleriniń osy iske qatysy bary jóninde resmi qujattar túspegen.
"Qazirgi ýaqytta bankter prokýratýra organdaryna istiń jai-japsary týraly resmi aqparat berý týraly suraý joldamaq. Qazirgi sátte bankterge qyzmetkerleriniń tergeýge qatysy baryna dálel keltiretin resmi derekter belgisiz. Resmi qujattar alynǵan soń, klientterdiń quqyqtary men múddeleriniń buzylýyna qatysty kez kelgen tergeý sharalaryna barynsha qoldaý kórsetýge daiynbyz", – delingen málimdemede.
Sonymen qatar bankter ózderiniń bedelin joǵary baǵalaitynyn jáne zań talaptaryna tolyq sáikes ashyq jumys isteitinin málimdedi. Qarjy uiymdary prokýratýrany qoǵamda rezonans týdyratyn máselelerge bailanysty jariia málimdemelerde abai bolýǵa shaqyrdy.
