قازاقستان قارجىگەرلەرى قاۋىمداستىعى اقمولا وبلىستىق پروكۋراتۋراسىنىڭ ۇقت ىسىنە بايلانىستى ءتورت قازاقستاندىق بانك قىزمەتكەرلەرىنىڭ اتى اتالعانىنا وراي بىرلەسكەن مالىمدەمە تاراتتى، دەپ حابارلايدى Dalanews.kz.
ەسكە سالايىق، 2 قىركۇيەكتە اقمولا وبلىستىق پروكۋراتۋراسى الەۋمەتتىك وسال توپتاعى ازاماتتاردى ۇرلاپ، ولاردىڭ اتىنا ءىرى كولەمدە نەسيە راسىمدەگەن ۇيىمداسقان قىلمىستىق توپتىڭ ءىسىن تەرگەۋدى اياقتاعانىن حابارلاعان ەدى. تەرگەۋ مالىمەتىنشە، ۇقت قۇرامىندا ەلدىڭ بىرنەشە ايماعىنان 25 ادام بولعان، ولاردىڭ اراسىندا بانك قىزمەتكەرلەرى دە بار دەلىنگەن.
بانكتەردىڭ ايتۋىنشا، پروكۋراتۋرادان ولاردىڭ قازىرگى نەمەسە بۇرىنعى قىزمەتكەرلەرىنىڭ وسى ىسكە قاتىسى بارى جونىندە رەسمي قۇجاتتار تۇسپەگەن.
"قازىرگى ۋاقىتتا بانكتەر پروكۋراتۋرا ورگاندارىنا ءىستىڭ جاي-جاپسارى تۋرالى رەسمي اقپارات بەرۋ تۋرالى سۇراۋ جولداماق. قازىرگى ساتتە بانكتەرگە قىزمەتكەرلەرىنىڭ تەرگەۋگە قاتىسى بارىنا دالەل كەلتىرەتىن رەسمي دەرەكتەر بەلگىسىز. رەسمي قۇجاتتار الىنعان سوڭ، كليەنتتەردىڭ قۇقىقتارى مەن مۇددەلەرىنىڭ بۇزىلۋىنا قاتىستى كەز كەلگەن تەرگەۋ شارالارىنا بارىنشا قولداۋ كورسەتۋگە دايىنبىز"، – دەلىنگەن مالىمدەمەدە.
سونىمەن قاتار بانكتەر وزدەرىنىڭ بەدەلىن جوعارى باعالايتىنىن جانە زاڭ تالاپتارىنا تولىق سايكەس اشىق جۇمىس ىستەيتىنىن مالىمدەدى. قارجى ۇيىمدارى پروكۋراتۋرانى قوعامدا رەزونانس تۋدىراتىن ماسەلەلەرگە بايلانىستى جاريا مالىمدەمەلەردە اباي بولۋعا شاقىردى.
