Bul týraly Qazaqstan prezidenti Nursultan Nazarbaev áleýmettik saiasatty iske asyrý máseleleri jónindegi keńeste aitty, dep habarlaidy Aqorda.
"Jaqynda ótken "Nur Otan" partiiasynyń sezinde áleýmettik saiasat salasyndaǵy sharalardyń iske asyrylýyn egjei-tegjeili qarastyrdyq. Men turmysy nashar jáne áleýmettik turǵydan az qamtylǵan turǵyndarǵa qoldaý kórsetý jóninde jańa aýqymdy sharalar usynǵan bolatynmyn. Biz búgin olardy iske asyrý jónindegi is-qimyl josparyn jan-jaqty talqylaimyz", – dedi prezident.
Basqosýda memleket basshysyna júktelgen mindetterdiń oryndalýy, sonyń ishinde áleýmettik saiasattyń júzege asyrylýyn zańnamalyq turǵydan qamtamasyz etilýi jóninde úkimettiń jumys jospary tanystyryldy.
Jiynǵa qatysýshylardyń baiandamasyn tyńdaǵan soń, Nazarbaev halyqtyń kómekke muqtaj sanatyna jatatyndardyń bárine áleýmettik járdem berý qajet ekenin aitty.
"Áleýmettik turǵydan turmysy tómen otbasylardy qoldaýǵa bólinetin qarajat salyq túsimi esebinen quralatynyn túsingen jón. Sondyqtan, memlekettiń tiisti tepe-teńdikti saqtai otyryp, kómekke asa muqtaj jandarǵa árdaiym qoldaý kórsetetinin barshaǵa túsindirý kerek", – dedi Nursultan Nazarbaev.
Qazaqstan prezidenti áleýmettik jaǵynan az qamtylǵan jáne kóp balaly otbasylar memlekettiń qamqorlyǵyn jaqyn arada sezinýge tiis ekenin atap ótti.
"Kómekke asa muqtaj jáne kóp balaly otbasylar biylǵy 1 sáýirden qalmai áleýmettik kómek alýy qajet", – dedi memleket basshysy.
Prezident memlekettik organdardyń basshylary men oblys ákimderiniń jumystaryn baǵalaý azamattardyń ál-aýqatynyń deńgeiine jáne turmys sapasyna tikelei bailanysty bolatynyn atap ótti.
Memleket basshysy óńirlerde jalaqyny ósirý jónindegi sharalardyń ýaqtyly qabyldanýynyń, bilim berý jáne densaýlyq saqtaý salalarynda júieli reformalar júrgizýdiń, turǵyn úiler men ishki aýdandyq joldardy salý qarqynyn kúsheitýdiń, sondai-aq turǵyn úi-kommýnaldyq sharýashylyǵy men ekologiia problemalaryn sheshýdiń mańyzdy ekenin aitty. Sonymen qatar, "Qutty meken" jáne "Aýyl – El besigi" jobalaryn ázirlep, júzege asyrýǵa erekshe nazar aýdaryldy.
"Oblystardyń, Astana, Almaty jáne Shymkent qalalarynyń ákimderi óńirdegi turǵyndardyń ózekti máselelerin jeke baqylaýǵa alyp, júktelgen mindetterdi iske asyrý úshin naqty sharalar qabyldaýy kerek. Sonymen qatar, áleýmettik saiasatty júzege asyrý úshin bólinetin qarajattyń tiimdi jumsalýyna baqylaý jasaý negizgi baǵyttyń biri sanalady", – dedi Nursultan Nazarbaev.
Memleket basshysy ekonomikalyq saiasattyń tiimdiligin arttyryp, bul úderiske turǵyndardyń belsendi atsalysýy qajettigin atap ótti.
"Eń aldymen, halyqty jumyspen qamtý kerek. Memlekettik apparattyń mindeti – shaǵyn jáne orta biznesti damytýǵa, jumys oryndaryn ashýǵa kúsh jumyldyrý. Bul jumysty barlyq qalalarda, aýdandar men aýyldarda jappai júrgizý qajet", – dedi ol.
Keńes sońynda memleket basshysy prezident ákimshiligine "Nur Otan" partiiasymen birlesip, júktelgen mindetterdiń oryndalý barysyn únemi baqylap otyrýdy tapsyrdy.
"Úkimet, ákimder, jurtshylyq jáne "Nur Otan" partiiasy naqty nátijelerge qol jetkizý úshin osy jumysqa atsalysýy tiis. Men bul úderisti ózim baqylaýǵa alamyn", – dedi Nazarbaev.
