Qazaqstanda 31 tamyzdan bastap «Isker aimaq» baǵdarlamasynyń jańa erejeleri kúshine endi. Endi áleýmettik kásipkerler úshin nesie alý burynǵydan da qoljetimdi bolmaq, dep habarlaidy dalanews.kz.
Jańartylǵan tártipke sáikes, áleýmettik kásipkerlerdiń nesiesi boiynsha syiaqy mólsherlemesiniń 50 paiyzyn memleket sýbsidiialaidy. Qalǵan bóligin kásipkerdiń ózi tóleidi. Al baǵdarlamanyń basqa qatysýshylary úshin sýbsidiia kólemi mólsherlemeniń 40 paiyzy.
Baǵdarlama mikro jáne shaǵyn biznes sýbektilerin, aýyl sharýashylyǵy kooperativterin, sondai-aq áleýmettik baǵyttaǵy jobalardy qamtidy. Nesieniń eń joǵary somasy 200 million teńge bolsa, sýbsidiialaý merzimi úsh jylǵa deiin belgilengen.
Jańa ózgerister aiasynda jobalardy iske asyrý merzimi de qysqartyldy. Burynǵy talaptarǵa qaraǵanda endi jobany júzege asyrýǵa 18 aiǵa deiin ýaqyt beriledi.
Sonymen qatar investitsiialyq shyǵyndardyń tizimi keńeitildi. Kásipkerler endi qazaqstandyq óndirýshilerden jyljymaityn múlik, jabdyqtar men kólik quraldaryn satyp alýǵa jumsalǵan qarajatty da baǵdarlama aiasynda qarjylandyra alady.
Taǵy bir mańyzdy jańalyq – eger «Damý» qory sýbsidiia berýden bas tartsa, kásipkerler bul sheshimge sot tártibimen shaǵymdanýǵa múmkindik alady. Mamandardyń pikirinshe, engizilgen ózgerister áleýmettik kásipkerlikti damytýǵa serpin berip, shaǵyn biznes úshin qarjylandyrýdyń qoljetimdiligin arttyrýǵa yqpal etedi.
