Túrkistan oblysynyń Saýran aýdanynda az qamtylǵan otbasylardy qoldaý jáne jergilikti ózin-ózi jumyspen qamtýdy damytýǵa baǵyttalǵan erekshe áleýmettik joba iske qosyldy. Jergilikti bilik bastamasymen qolǵa alynǵan «Áleýmettik baqsha» jobasy aiasynda jańa áleýmettik dúkender tegin paidalanýǵa beriledi. Jobanyń basty maqsaty – áleýmettik osal toptardy qoldaý jáne jergilikti ózin-ózi jumyspen qamtý deńgeiin arttyrý,- dep habarlaidy Dalanews.kz
Dúkender áleýmettik osal toptardyń ókilderine tegin usynylady. Endi zeinetkerler, kópbalaly otbasylar jáne basqa da muqtaj jandar ózderi ósirgen nemese daiyndaǵan ónimderin sata alady. Dúken sórelerinde jańa pisken kókónister, jemister, jidekter, úide daiyndalǵan taǵamdar, sút ónimderi jáne basqa da tabiǵi ónimder bar.
Bul bastamany Túrkistan oblysynyń ákimi Nuralyhan Kósherov ta qoldap, jumys sapary barysynda jańa saýda oryndaryn aralap, turǵyndarmen sóilesip, ónim túrlerimen jáne saýda sharttarymen tanysty. Ol mundai jobalardyń aýyldyq óńirlerdiń turaqty damýy úshin mańyzdylyǵyn atap ótti.
– Bul – jai ǵana saýda orny emes, ómirdiń qiyn jaǵdailaryna qaramastan óz eńbegimen tabys tabýǵa umtylatyn adamdardy qoldaityn alań. Joba oblystyń basqa aýdandaryna da úlgi bolady, – dedi óńir basshysy.
Sonymen qatar búgin turǵyndarǵa qoljetimdi baǵamen aýyl sharýashylyǵy ónimderi usynylǵan arnaiy jármeńke de uiymdastyryldy. Jármeńkede Saýran aýdanynyń sharýashylyqtary óndirgen ekologiialyq taza aýyl sharýashylyǵy ónimderi usynyldy. Memlekettik grant alǵan jas kásipkerlerdiń ónimderi de saýdaǵa shyǵaryldy. Bul jastardy kásipkerlikke tartýǵa yqpal etip qana qoimai, jergilikti naryqty sapaly otandyq ónimdermen qamtamasyz etýdiń bir joly bolyp tabylady.
Jańa joba jergilikti halyq pen bilik tarapynan joǵary baǵalanyp, aldaǵy ýaqytta oblystyń basqa aýdandaryna taralýy múmkin.
