«Ulttyq aýdarma biýrosynyń» málimeti boiynsha, 2017-2018 jyldary 47 oqýlyq qazaq tiline aýdarylyp, elimizdegi 132 ýniversitetke jetkizilgen. Jańa oqýlyqtar 2018-2019 oqý jylynan bastap joǵary bilim berý júiesine engizildi. 2019-2020 jyldary úshinshi lektegi 30 oqýlyq aýdarylyp basyldy.
Olar da jaqyn ýaqytta ýniversitetterge taratylmaq. Sondai-aq, atalmysh biýronyń atqarýshy direktory Raýan Kenjehanulynyń aitýynsha, barsha qaýymǵa qoljetimdi bolýy úshin oqýlyqtardyń elektrondy nusqalary OpenU.kz platformasy men Kitap.kz portaldaryna ornalastyryldy.
«Áý basta aýdarylatyn kitaptardy tańdaý úshin elimizdegi barlyq oqý oryndarynan usynystar jinalyp, jalpy sany 800-den astam oqýlyqtyń ataýyn tizdik. Jinaqtalǵan tizimderdiń negizinde birneshe ret basylǵan, sońǵy basylymy keiingi 3 jylda shyqqan, mazmundyq turǵydan beitarap bolýy qajet degen 100 oqýlyq tańdaldy. Qazir jobanyń tórtinshi kezeńine tańdalǵan 23 oqýlyqty aýdarý protsesi júrip jatyr. Osy oraida, kópshiliktiń pikirleri eskerilip, sońǵy aýdarylatyn oqýlyqtardyń qataryna Shyǵys kitaptaryn da kóptep qostyq», - dedi Raýan Kenjehanuly.
Onyń aitýynsha, aýdarylǵan kitaptarǵa qoǵam qyzyǵýshylyǵy artqan soń Nur-Sultan jáne Almaty qalalaryndaǵy iri kitap dúkenderi arqyly satylymǵa qoiylǵan. Bul jumystar jekemenshik baspalar arqyly uiymdastyrylyp, memleket qarjysy shyǵyndalmaǵan.
Aita keteiik, aýdarylǵan kitaptardyń qatarynda filosofiia, psihologiia, menedjment, innovatsiia, biznes, media syndy salalar boiynsha álemdik bestsellerler de bar. Atap aitsaq, Ernst Gombrihtiń «Óner tarihy», Iýval Noi Hararidiń «Sapiens: adamzattyń qysqasha tarihy», Klaýs Shvabtyń «Tórtinshi óndiristik revoliýtsiia», Filipp Kotlerdiń «Marketing negizderi», Rikki Ý Grifinniń «Menedjment» syndy kitaptary ártúrli tańdaýly synshylardyń oń baǵasyn alǵan.
Qazaqstan Respýblikasy Aqparat jáne qoǵamdyq damý ministrligi «Rýhani jańǵyrý» departamentiniń direktory Nurlan Kúntýovtyń pikirinshe, Joba aiasyndaǵy kitaptar elimizdiń ortalyqtarynda ǵana emes, shalǵai aimaqtarda da suranysqa ie.
Aimaqtarǵa barǵanymyzda baiqaimyz, búginde stýdentter osy oqýlyqtarmen sýsyndap, bilim alyp júr. Ásirese aýyldan kelgen jastarǵa jaqsy – álemniń úzdik kitaptaryn qazaq tilinde oqýǵa múmkindik alyp otyr. Bul «Rýhani jańǵyrý» baǵdarlamasynyń jemisti jobalarynyń biregeii, - dedi Nurlan Kúntýov.
