Jaza arqalaǵandardyń aldy 10 jylǵa sottalǵa, taǵy tórteýi shartty túrde bas bostandyǵynan aiyryldy. Al Arys qalasynyń myń jarym turǵyny jábirlenýshi retinde tanylǵan.
Arys qalasyndaǵy qarý-jaraq qoimasynan shyqqan jarylysqa qatysy bar dep tanylǵandarǵa úkim Shymkentte oqyldy. Jabyq esik jaǵdaiynda ótken sotqa tilshiler qatystyrylmaǵan.
Al jábirlenýshiler úkimge kóńilimiz tolmaidy deidi. Sebebi: myń jarym jábirlenýshiniń biri úi-jaiynan, keibiri densaýlyǵynan airylǵan.
“Osy sot shyǵynymyzdy ótep bere me dep úsh jyl kútkende, san soǵyp qaldyq”, - deidi arystyqtar.
Máselen, qala turǵyny Aitbek Rysbek jarylysqa jaýapty azamattardan 20 mln teńge moraldyq ótemaqy talap etkenin aitady. Taǵy bir zardap shekken turǵyn Qorǵanys ministrligin sotqa bermek, sebebi úsh jyldan beri eshqandai ótemaqy almaǵan.
400 tomǵa arqaý bolǵan isti sot bir jyldan astam ýaqyt qaraǵan. Myń jarym adam jábirlenýshi retinde ótken sotta 16 adamǵa aiyp taǵylǵan.
Sýdia olardyń 12-ne 4-10 jyl aralyǵynda úkim kesti. Taǵy tórteýi 4-7 jyl aralyǵynda shartty merzimge sottaldy.
Alaida jabyq esik jaǵdaiynda ótkizilgen sot úkimine ne sottalýshylar, ne jábirlenýshiler riza emes.
Sottalýshy taraptyń qorǵaýshysy Bekjan Nurmaǵanbet jarylysty eshkim qoldan istegen joq degen pikirde.
16 adamnyń sottalyp ketkenine jábirlenýshilerdiń de kóńili tolmaidy. Olar “shortandar qutylyp, shabaqtar jazalandy” dep sanaidy.
- Bul joǵarydan kele jatqan júie, jáilap-jáilap osyǵan deiin jetti. Bul balalar tek qyzmetin istedi. Ol bir jylǵy, eki jylǵy jinalǵan nárse emes. Ol 30, 40 jyl ma, 50 jyl ma, sondai nárse. Sodan osy kezge kelip jarylǵan, ol balalar qalai kináli bolady?”, – deidi turǵyndardyń birazy.
2019 jyldyń maýsymynda Arystaǵy áskeri bólimdegi oq-dári saqtalǵan qoima jarylyp, tórt adam mert bolǵan.
Arys pen mańaidaǵy aýyldardan 40 myń adam qaýipsiz jerge kóshirilip, 8 myńǵa jýyq turǵyn úi zaqymdandy. Endi áskeri sottan qaiyr kútken myń jarym jábirlenýshi azamattyq sotqa shaǵym túsirýi kerek, al sottalǵandar apelliatsiiaǵa beremiz dep bel býyp otyr. Úsh jyldan beri kele jatqan aiǵai-shý taǵy jalǵasady.
https://www.youtube.com/watch?v=7dMOteThSSs
Bas taqyryptyń sýreti Azattyq saitynan alyndy.
