جازا ارقالاعانداردىڭ الدى 10 جىلعا سوتتالعا، تاعى تورتەۋى شارتتى تۇردە باس بوستاندىعىنان ايىرىلدى. ال ارىس قالاسىنىڭ مىڭ جارىم تۇرعىنى جابىرلەنۋشى رەتىندە تانىلعان.
ارىس قالاسىنداعى قارۋ-جاراق قويماسىنان شىققان جارىلىسقا قاتىسى بار دەپ تانىلعاندارعا ۇكىم شىمكەنتتە وقىلدى. جابىق ەسىك جاعدايىندا وتكەن سوتقا تىلشىلەر قاتىستىرىلماعان.
ال جابىرلەنۋشىلەر ۇكىمگە كوڭىلىمىز تولمايدى دەيدى. سەبەبى: مىڭ جارىم جابىرلەنۋشىنىڭ ءبىرى ءۇي-جايىنان، كەيبىرى دەنساۋلىعىنان ايرىلعان.
“وسى سوت شىعىنىمىزدى وتەپ بەرە مە دەپ ءۇش جىل كۇتكەندە، سان سوعىپ قالدىق”، - دەيدى ارىستىقتار.
ماسەلەن، قالا تۇرعىنى ايتبەك رىسبەك جارىلىسقا جاۋاپتى ازاماتتاردان 20 ملن تەڭگە مورالدىق وتەماقى تالاپ ەتكەنىن ايتادى. تاعى ءبىر زارداپ شەككەن تۇرعىن قورعانىس مينيسترلىگىن سوتقا بەرمەك، سەبەبى ءۇش جىلدان بەرى ەشقانداي وتەماقى الماعان.
400 تومعا ارقاۋ بولعان ءىستى سوت ءبىر جىلدان استام ۋاقىت قاراعان. مىڭ جارىم ادام جابىرلەنۋشى رەتىندە وتكەن سوتتا 16 ادامعا ايىپ تاعىلعان.
سۋديا ولاردىڭ 12-نە 4-10 جىل ارالىعىندا ۇكىم كەستى. تاعى تورتەۋى 4-7 جىل ارالىعىندا شارتتى مەرزىمگە سوتتالدى.
الايدا جابىق ەسىك جاعدايىندا وتكىزىلگەن سوت ۇكىمىنە نە سوتتالۋشىلار، نە جابىرلەنۋشىلەر ريزا ەمەس.
سوتتالۋشى تاراپتىڭ قورعاۋشىسى بەكجان نۇرماعانبەت جارىلىستى ەشكىم قولدان ىستەگەن جوق دەگەن پىكىردە.
16 ادامنىڭ سوتتالىپ كەتكەنىنە جابىرلەنۋشىلەردىڭ دە كوڭىلى تولمايدى. ولار “شورتاندار قۇتىلىپ، شاباقتار جازالاندى” دەپ سانايدى.
- بۇل جوعارىدان كەلە جاتقان جۇيە، ءجايلاپ-جايلاپ وسىعان دەيىن جەتتى. بۇل بالالار تەك قىزمەتىن ىستەدى. ول ءبىر جىلعى، ەكى جىلعى جينالعان نارسە ەمەس. ول 30، 40 جىل ما، 50 جىل ما، سونداي نارسە. سودان وسى كەزگە كەلىپ جارىلعان، ول بالالار قالاي كىنالى بولادى؟”، – دەيدى تۇرعىنداردىڭ ءبىرازى.
2019 جىلدىڭ ماۋسىمىندا ارىستاعى اسكەري بولىمدەگى ءوق-دارى ساقتالعان قويما جارىلىپ، ءتورت ادام مەرت بولعان.
ارىس پەن ماڭايداعى اۋىلداردان 40 مىڭ ادام ءقاۋىپسىز جەرگە كوشىرىلىپ، 8 مىڭعا جۋىق تۇرعىن ءۇي زاقىمداندى. ەندى اسكەري سوتتان قايىر كۇتكەن مىڭ جارىم جابىرلەنۋشى ازاماتتىق سوتقا شاعىم ءتۇسىرۋى كەرەك، ال سوتتالعاندار اپەللياسياعا بەرەمىز دەپ بەل بۋىپ وتىر. ءۇش جىلدان بەرى كەلە جاتقان ايعاي-شۋ تاعى جالعاسادى.
https://www.youtube.com/watch؟v=7dMOteThSSs
باس تاقىرىپتىڭ سۋرەتى ازاتتىق سايتىنان الىندى.
