Áleýmettik jelide ekinshi deńgeidegi bankter tólem júielerin qandai da bir standarttarǵa kóshirip jatqany, soǵan bailanysty 7-9 qarasha aralyǵynda júrgizilgen banktik operatsiialarda qatelik oryn alýy múmkin ekeni týraly habarlama taraýda. Sol sebepti tólemderdi qolma-qol aqshamen jasaýǵa keńes te beriledi. Osy aqparatqa qatysty QR Ulttyq banktiń baspasóz qyzmeti túsinikteme berip, málimdeme jasady, dep habarlaidy Dalanews.kz.
Bul aqparat belgili bir deńgeide durys emestigi naqtylanady. Alaida QR Ulttyq banki ekinshi deńgeili banktermen birlesip, eldiń tólem júielerine ISO 20022 halyqaralyq tólem habarlamalary formatyn engizip jatqany ras eken. Biraq onyń kartochkalarmen jasalatyn tólemderge esh qatysy joq!
"Halyqaralyq tólem habarlamalary standartyn qoldaný bankterde klientke qarjy qyzmetin kórsetý tártibin ózgertpeidi. Bul jumystardyń kartochkalarmen jasalatyn tólemderge esh qatysy joq. Osylaisha, halyqtyń tólem kartalary, QR-kodtar, mobildi aýdarymdar, bankomattardan qolma-qol aqsha alý, uialy bailanys tólemderi jáne basqa da tólemder ózgerissiz qalady", delingen QR Ulttyq banktiń baspasóz qyzmeti taratqan habarlamada
Sonymen qatar, aqparat júielerin baptaý qajet bolǵandyqtan, bankter tehnikalyq jumystar júrgizedi.
"Sondai kezde bankaralyq qyzmet kórsetýge bailanysty tólemderdi qabyldaý kestesinde qysqamerzimdi ózgerister bolýy múmkin (qarjy uiymdary ISO 20022-ni engizetin demalys kúnderinde). Qarjy mekemeleri qazir klientterin jańa standartqa kóshýge bailanysty tehnikalyq jumystar júrgiziletin ýaqyt týraly aldyn ala habardar etip jatyr. Bul jumystar 2024 jylǵy qarashanyń aiaǵyna deiin júzege asyrylady", dep eskertedi Ulttyq bank.
Anyqtama: ISO 20022 – elektrondy habarlama almasatyn álemdik standart. Ol qarjy uiymdary arasyndaǵy biznes-protsesterdi avtomattandyrý úshin jasalǵan. Bul standartqa kóshý naryq qatysýshylaryna ISO 20022 negizinde júzege asyrylatyn jańa sheshimderge qol jetkizýge múmkindik beredi, sondai-aq bank operatsiialaryn júrgizý kezinde tólem habarlamalaryn almasýdyń birizdendirilgen modelin qoldaný arqyly barlyq taraptyń shyǵynyn azaitady.
