Jýyrda Almatyda tanymal jýrnalist, professor Káken Hamzin kiberalaiaqtardyń quryǵyna túsip, basyndaǵy jalǵyz páterinen aiyrylyp qaldy. Alaiaqtarǵa aldanyp qalǵan tanymal professor jaqsy jańalyǵyn jetkizdi, dep habarlaidy Dalanews.kz.
"Bir jarym ai buryn baspanamnan airylyp qala jazdaǵan aýyr jaǵdai bastan ótti. Ókinishke qarai, alaiaqtarǵa aldanyp, úiimdi qaitaryp alý úshin shildeniń 5-inen bastap el-jurttan "jylý" jinaýǵa májbúr boldym. Bul men úshin de, otbasym úshin de ońai sheshim bolmady. “Ólimnen uiat kúshti” deidi. Biraq sizderdiń shynaiy janashyrlyqtaryńyz, qoldaýlaryńyz, jyly sózderińiz bizge úmit syilady. Allaǵa myń da bir shúkir, búgin sol "jylý" jinaýdy resmi túrde toqtatatynymdy qýana habarlaimyn. Osylaisha jinalǵan qarajat 9 529 836 teńgege jetti", - dedi ol.
Jýrnalist Atymtai Jomart azamat kómegin aiamaǵanyn da jetkizdi.
"Al endi eń kútpegen ári júrekti eljiretken sát, búgin bir qaiyrymdy azamat (aty-jónin aitpaýdy surady) jetpei turǵan úlken somanyń barlyǵyn (23 mln teńge) qolma-qol ákelip berdi. Bul tek qarjylai kómek qana emes, bul - senimniń, birliktiń, meiirimniń naǵyz kórinisi.
Ol azamatqa Alla razy bolsyn! Otbasyna, ózine tek jaqsylyq tileimin! Rizashylyǵymdy bildiremin! Endi Allanyń qalaýymen satyp alýshy otbasyǵa tolyq aqshasyn tabystap, úidi óz atyma qaita rásimdeýge kirisemiz. Men osy jolda kómek kórsetken, tilektes bolǵan barshańyzǵa shyn júrekten alǵys aitamyn! Bireý jyly sózin aiamady, bireý qarjy aýdardy, bir baýyrym kelip suhbat aldy, bireý duǵa jasady, báriniń orny bólek. Bul oqiǵa maǵan bir nárseni anyq dáleldedi: qazaqtyń baýyrmaldyǵy, bir-birine degen janashyrlyǵy áli de bar, joǵalǵan joq. Alla barshańyzǵa razy bolsyn!", - dep jazdy professor.
Eske salaiyq, buǵan deiin ziialy qaýym ókili bul týraly óziniń áleýmettik jelidegi paraqshasynda kópshilikke egjei-tegjeili baiandap berdi.
