Almaty oblysyndaǵy jańa Alataý qalasynda Naýryz merekesine arnalǵan aýqymdy sharalar alǵash ret ótti. Merekege shamamen 5000 turǵyn men qonaq qatysty. Bul shara búkil qala úshin jarqyn ári erekshe oqiǵaǵa ainaldy. Qalanyń aýqymdylyǵyn eskere otyryp, merekelik is-sharalar birden eki shaǵyn aýdanda – Yntymaq pen Jetigende qatar uiymdastyryldy, – dep habarlaidy Dalanews.kz Almaty oblysy ákiminiń baspasóz qyzmetine silteme jasap.
Mundaǵy maqsat – árbir turǵynnyń osy shýaqty merekeniń atmosferasyn sezinýine múmkindik berý. Ár shaǵyn aýdanda kiiz úiler tigilip, kelgen qonaqtarǵa dástúrli taǵamdar tegin usynyldy. Merekelik kóńil-kúidi tanymal ártister men jergilikti shyǵarmashylyq ujymdardyń óner kórsetýleri tolyqtyrdy.
Sahnada 5 mýzykalyq ansambl, 5 jeke oryndaýshy, 3 bi toby, sondai-aq dástúrli qazaq kúilerin oryndaǵan 150 dombyrashydan quralǵan ansambl óner kórsetti. Qonaqtar halyq mýzykasy men bilerden lázzat alyp, jastar úshin arnaiy uiymdastyrylǵan 7 sporttyq jarys pen 4 dástúrli qolóner sheberlik saǵattaryna qatysty.
Tusaýkeser – náresteniń alǵashqy qadamyn bildiretin, jarqyn bolashaqqa jeteleitin salt.
Besikke salý – sábidi besikke bóleý rásimi, úlkenderdiń aq batasymen qatar júredi.
Qyz uzatý – qalyńdyqty uzatyp salý rásimi, aq tilekter men dástúrli ándermen órnekteledi.
Merekeniń eń áserli oqiǵalarynyń biri dástúrli qazaq oiyny – «Qoi kóterý» boldy. Bul saiysta 20 kúsh iesi shydamdylyq pen tózimdilikke synaldy. Jeńimpaz 45 kelilik qoshqardy iyǵynda 3 minýt 18 sekýnd boiy ustap turdy.
Naýryz qarsańynda qalada aýqymdy senbilik uiymdastyrylyp, oǵan 1000-nan astam turǵyn belsendi qatysty. Birlesken kúsh-jigerdiń arqasynda jalpy aýdany 25 gektar aýmaq qoqystan tazartylyp, kórkeitildi.
Alataý qalasynyń ákimi Árken Ótenov bul sharanyń mańyzdylyǵyn atap ótip, óz sózinde:
– Qalamyzdaǵy alǵashqy Naýryz birlik pen dostyqtyń simvolyna ainaldy. Kóktemgi jańarý ár úige beibitshilik, baqyt jáne amandyq ákelsin! – dep jyly lebizin bildirdi.
