Prezident óz sózinde «Basqasha aitqanda, ózimizdiń azamattardy turǵyn úimen qamtamasyz etý máselesine jiti kóńil bólinetin bolady. Bul jumys jemisin beretin kún de alys emes dep, oilaimyn», – dep sózin naqtylai túsken edi.
Toqaevtyń tapsyrmasynan keiin óńirlerde halyqty turǵyn úimen qamtamasyz etý úshin túrli pilottyq jobalar bastaý aldy. Kezek jeke dara bólinip shyqqan Almaty oblysyna da kelip jetken jaiy bar.
Respýblika boiynsha 6 pilottyq joba iske asyp jatsa, sonyń biri Almaty oblysyna tiesili. «Alataý jastary» degen ataýdy alǵan bul bastama talaidyń «úi alamyn» degen úmitin úkiletkeni anyq.
Qarasha aiynyń basynan qujat jinaýdy bastaǵan joba máresine jetýge az qaldy. Aǵymdaǵy jyldyń qarashanyń 31 juldyzynda ótinim qabyldaý toqtatylady.
Ainalasy 25 kúnniń ishinde úi alamyn degen armanyna qanat bitirip, qujattaryn ótkizbekke nietti 2000 adamnan ótinim kelip túsken. Olardyń tek jartysynyń, iaǵni, bir myń azamattyń qujaty qabyldaýdan ótken.
– Basty sebep, halyqtyń shartty durys túsinbeýinde», – deidi Almaty oblysy jastar resýrstyq ortalyǵynyń basshysy Maqsat Keneshov. – Almaty oblysy ekige bólingennen keiin az ýaqyttyń ishinde jastarǵa arnalǵan turǵyn úi baǵdarlamasy iske qosyldy. Árine, bul tyń bastama oblys jastaryna úmit syilaǵany anyq. Alaida, nasihat jumystarynyń jetkilikti deńgeide bolmaýyna bailanysty Almaty qalasynyń turǵyndary bizge qujattaryn ótkizgen jaǵdailar kezdesti. Jobanyń birinshi kezeńiniń aiaqtalýyna sanaýly kúnder qalsada, jastar óz ótinimderin qaldyra alady, –dedi Maqsat Keneshov.
Buǵan deiinde aitylǵandai baǵdarlamaǵa 35 jasqa deiingi azamattar qatysa alady.
Qatysýshy Qazaqstan Respýblikasynyń azamaty bolýy tiis. Sondai-aq, jubaiynyń (zaiybynyń) jasyna qaramastan, baǵdarlamaǵa qatysý úshin ótinish bergen kezdegi baǵdarlamaǵa qatysýshynyń jasy 35 jasqa deiin (qosa alǵanda). Baǵdarlamaǵa negizgi qatysýshy retinde qatysýǵa erli-zaiyptylardyń bireýi ǵana ruqsat etiledi.
Baǵdarlamaǵa qatysýshyda jáne onyń otbasy múshelerinde sońǵy 5 (bes) jylda Qazaqstan Respýblikasynyń aýmaǵynda satyp alý quqyǵymen jalǵa beriletin turǵyn úidiń nemese menshik quqyǵyndaǵy turǵyn úidiń (erli-zaiyptylardyń ortaq birlesken menshigi, ótinishke engiziletin otbasynyń basqa múshelerimen birlesip ortaq úlestik menshik) bolmaýy kerek.
Qatysýshynyń tańdalǵan saladaǵy resmi jumys ótili Almaty oblysynda ótinish bergen sátte sońǵy bir jyldan kem emes, zeinetaqy shotynan úzindi kóshirmemen rastalatyn bolady.
Esterińizge salamyz, nesie somasy 10 mln teńge. Bastapqy jarna talap etilmeidi. Egerde, qatysýshy ekinshi deńgeili úidi satyp alamyn dep sheshim qabyldasa onda 10 paiyz jarna salýy qajet. Sonymen qatar, kózdegen úi baǵasy berilgen qarajattan asyp ketse, qalǵan qarjyny ózi qosýy shart.
Paiyzdyq mólsherle – jyldyq 5%-ǵa deiin. Al qaryz merzimi – 19 jylǵa deiin
Eń basty talap – tólem qabilettiligin rastaý.
Banktiń ishki qujattaryna sáikes júrgiziletin kredittik turǵyn úi satyp alý úshin salymshy bolyp tabylatyn baǵdarlamaǵa qatysýshynyń qarjylyq múmkindikteri aiqyndalatyn bolady.
Eskertetin jait, qatysýshylar qujattaryn ótkizgennen keiin komissiia músheleri arnaiy talaptrdy qarastyryp, baldyq júiemen baǵalataityn bolady. Eń joǵary baldyń jiyntyǵy 325,5 upaidy quraityn bolady.
Oblystyq jastar ortalyǵynyń aitýynsha, alǵashqy jyly 60 úige, 600 mln teńge qarjy bólingen. Keler jyly bul kórsetkish ulǵaiýy múmkin.
– Biyl birinshi ret ótkizilgendikten jobaǵa nasihat az boldy. Kelesi jyly jalǵasyn tapsa, aqparattandyrýǵa den qoiý kerek dep oilaimyn. Jalpy joba jastardyń úi alýyna úlken múmkindik beredi. Talaptarǵa kóz júgirtseńiz kóptegen jeńildikter qarastyrylǵan. Baǵy janǵan adam baspanaly bolady, – dep atap ótti Maqsat Keneshov.
Aita keteiik, búgingi kúni arnaiy «Call-ortalyq» jumys jasap otyr. +7 775 789 21 60 bailanys nómiri arqyly tolyq aqparatty alýǵa bolady.
Jastar saiasaty baǵytyndaǵy biylǵy jyldyń basty jobasy máresine jetýge taiaý. Jaýaptylardyń sózine sensek, jańa jyl merekesiniń qarsańynda joba qatysýshylary qonys toiyn toilap bastaidy dep kútilýde.
