Ásirese, sovettik HH ǵasyrda. Alash Azamattarynan túgel aiyryldyq. Bári derlik tuqym-juraǵatsyz ketti. Joǵaryda kóringen, ataqtylar ǵana emes. Aýyl muǵaliminen eti tiri qarapaiym sharýaǵa deiingi aralyqtaǵy, óz betimen oilap, óz yrqymen júre alatyn, qorlyq, zorlyq, qyspaq ataýlyny jan-tánimen sezinetin, imandy, minezdi, óz basy, ázirshe, ósken orta, árqily jaǵdai nátijesinde shekteýli óriste ǵana qalǵan, biraq bolashaqta deni túzý, jaqsy tuqym bere alatyn, el kóleminde bolmasa da, aýdan-aýyl kóleminde kisiligin saqtaityn keleshek namysty qazaqtardyń ata, ákeleri orta joldan, nemese kóktei qiyldy.
Bularmen qatar jasaǵan, kónbis, momyn, keiinnen, basqa bir, kóbine-kóp ortaqol shańyraqtarda dúniege kelgen mojan-topai qaýym ǵalamat asharshylyqqa ushyrady, qyrǵyn soǵysty bastan ótkerdi, tyń igerý, jappai janyshtaý topanynyń astynda qaldy – aqyr túbinde ult múddesi turypty, adamdyq namystyń ózi tárk etilip, kúnkóris, qaryntoqtyǵyn qamdaý birinshi orynǵa shyqty.
Sonymen qatar, bul kezde kimniń nany júrdi desek… – dańǵoi belsendi, raqymsyz qyzyljaǵa, adamshylyq, izgilik ataýlydan kende jalaqor men jandaishap, qatardaǵy keńse qyzmetkerinen qalalyq, oblystyq deńgeige deiingi aralyqtaǵy, zamannyń yńǵaiyn tapqan mánsapqor basshylar men men kónbis jalshylar! Solardyń urpaǵy eselep, toqsaýsyz ósip-óndi, oqyp-jetti, barlyq jerde berik ornyqty. Sóitip, ulttyń turaqty genofondyndaǵy teksizder men jetesizderdiń úles salmaǵy ólsheýsiz kóbeidi, kerek deseńiz, basym kópshililkee ainaldy.
…Búgingi el qamyn oilaityn birli-jarym alash azamattaryn aiaqtan shalǵan, tóbeden urǵan, qaitken kúnde ózderiniń kúiki oi, teris piǵyldaryn kúndelikti baspasózderden – joǵary bilikke deiingi aralyqta toqtaýsyz ótkizip otyrǵan ultsyzdyqtyń qýat-kúshi eń aldymen osyndai jetesizdikte jatyr.
Muhtar Maǵaýin, Ultsyzdaný urany. «Alash», Almaty – 2004 j. 57-b
Derekkóz: qazaquni.kz
