Halyqtyń pikirin tyńdap, sailaýshylarmen suhbattasý maqsatynda Úsharal qalasyndaǵy Alakól gýmanitarlyq-tehnikalyq kolledjinde ornalasqan №49 sailaý ýchaskesine bardyq. Esikten kirgende zalalsyzdandyrý týnneli ornatylǵan jáne dárigerler ár turǵynnyń dene qyzýyn arnaiy quraldarmen tekserýde. Saqtyq úshin qosymsha betperdeler de qarastyrylyp, antiseptikter de qoiylǵan. Daýys berýshiler araqashyqtyqty saqtai otyryp, arnaiy belgilengen jolmen júrýde.
Ómirinde alǵashqy ret sailaýǵa qatysyp, keleshek úshin tańdaý jasaýǵa kelgenderdiń biri - Halyqaralyq aqparattyq tehnologiialar ýniversiteti jýrnalistika mamandyǵynyń stýdenti Asylan Mahanov: «Bolashaq jastardyń qolynda. Sondyqtan da memleketimizdiń myzǵymas irgetasyn qalaýǵa ár qatarlasym óz úlesin qosýy tiis dep sanaimyn. Búgingi sailaý sondai múmkindiktiń biri. Sebebi, biz óz daýysymyz arqyly erteńgi kúnge jol qalap, baǵytymyzdy aiqyndaýǵa septigimizdi tigizbekpiz. Al mundai taǵdyrsheshti sátte ortaq isten shet qalý azamattyǵymyzǵa syn dep bilemin. Óitkeni, búgingi bizdiń kishkentai qadamymyz bolashaqtaǵy úlken jetistikterdiń bastaýy bolmaq. Bir qýantarlyǵy, sailaýǵa halyq kóptep qatysýda. Ózim daýys bergennen keiin de syrttai baqylap turdym. Jastar da, qariialar da kelip tańdaýlaryn jasaýda. Eń kóbi orta býyndaǵy turǵyndar. Osy rette jastardyń da tańdaý jasaýǵa degen yqylasy arta tússe degen niettemin», - dedi.
Shyny kerek, alakóldikter bul naýqanda asa belsendilik tanytýda. Sailaý ýchaskelerine jinalǵandardyń qarasy kóp. Bul óz kezeginde adaldyq pen ádildikke jol ashpaq. Bul sailaýǵa barlyq mekeme qyzmetkerleri de biraýyzdan qatysyp, ózderiniń keleshekke degen senimderin kórsetýde. Sondyqtan da arnaiy ýaqyt bólip, el múddesi úshin eńbek etip jatqan myńnan asa qyzmetker sailaýǵa kelýde. Bul sailaýda ár turǵynnyń pikiri men daýysy mańyzdy bolǵandyqtan olar ózderiniń konstitýtsialyq quqyqtarynyń negizinde daýys berýde.
Almat ESENBEK
