حالىقتىڭ پىكىرىن تىڭداپ، سايلاۋشىلارمەن سۇحباتتاسۋ ماقساتىندا ءۇشارال قالاسىنداعى الاكول گۋمانيتارلىق-تەحنيكالىق كوللەدجىندە ورنالاسقان №49 سايلاۋ ۋچاسكەسىنە باردىق. ەسىكتەن كىرگەندە زالالسىزداندىرۋ تۋننەلى ورناتىلعان جانە دارىگەرلەر ءار تۇرعىننىڭ دەنە قىزۋىن ارنايى قۇرالدارمەن تەكسەرۋدە. ساقتىق ءۇشىن قوسىمشا بەتپەردەلەر دە قاراستىرىلىپ، انتيسەپتيكتەر دە قويىلعان. داۋىس بەرۋشىلەر اراقاشىقتىقتى ساقتاي وتىرىپ، ارنايى بەلگىلەنگەن جولمەن جۇرۋدە.
ومىرىندە العاشقى رەت سايلاۋعا قاتىسىپ، كەلەشەك ءۇشىن تاڭداۋ جاساۋعا كەلگەندەردىڭ ءبىرى - حالىقارالىق اقپاراتتىق تەحنولوگيالار ۋنيۆەرسيتەتى جۋرناليستيكا ماماندىعىنىڭ ستۋدەنتى اسىلان ماحانوۆ: «بولاشاق جاستاردىڭ قولىندا. سوندىقتان دا مەملەكەتىمىزدىڭ مىزعىماس ىرگەتاسىن قالاۋعا ءار قاتارلاسىم ءوز ۇلەسىن قوسۋى ءتيىس دەپ سانايمىن. بۇگىنگى سايلاۋ سونداي مۇمكىندىكتىڭ ءبىرى. سەبەبى، ءبىز ءوز داۋىسىمىز ارقىلى ەرتەڭگى كۇنگە جول قالاپ، باعىتىمىزدى ايقىنداۋعا سەپتىگىمىزدى تيگىزبەكپىز. ال مۇنداي تاعدىرشەشتى ساتتە ورتاق ىستەن شەت قالۋ ازاماتتىعىمىزعا سىن دەپ بىلەمىن. ويتكەنى، بۇگىنگى ءبىزدىڭ كىشكەنتاي قادامىمىز بولاشاقتاعى ۇلكەن جەتىستىكتەردىڭ باستاۋى بولماق. ءبىر قۋانتارلىعى، سايلاۋعا حالىق كوپتەپ قاتىسۋدا. ءوزىم داۋىس بەرگەننەن كەيىن دە سىرتتاي باقىلاپ تۇردىم. جاستار دا، قاريالار دا كەلىپ تاڭداۋلارىن جاساۋدا. ەڭ كوبى ورتا بۋىنداعى تۇرعىندار. وسى رەتتە جاستاردىڭ دا تاڭداۋ جاساۋعا دەگەن ىقىلاسى ارتا تۇسسە دەگەن نيەتتەمىن»، - دەدى.
شىنى كەرەك، الاكولدىكتەر بۇل ناۋقاندا اسا بەلسەندىلىك تانىتۋدا. سايلاۋ ۋچاسكەلەرىنە جينالعانداردىڭ قاراسى كوپ. بۇل ءوز كەزەگىندە ادالدىق پەن ادىلدىككە جول اشپاق. بۇل سايلاۋعا بارلىق مەكەمە قىزمەتكەرلەرى دە ءبىراۋىزدان قاتىسىپ، وزدەرىنىڭ كەلەشەككە دەگەن سەنىمدەرىن كورسەتۋدە. سوندىقتان دا ارنايى ۋاقىت ءبولىپ، ەل مۇددەسى ءۇشىن ەڭبەك ەتىپ جاتقان مىڭنان اسا قىزمەتكەر سايلاۋعا كەلۋدە. بۇل سايلاۋدا ءار تۇرعىننىڭ پىكىرى مەن داۋىسى ماڭىزدى بولعاندىقتان ولار وزدەرىنىڭ كونستيتۋسيالىق قۇقىقتارىنىڭ نەگىزىندە داۋىس بەرۋدە.
المات ەسەنبەك
