Jarystyń saltanatty ashylýynda sóz sóilegen oblys ákimi Amandyq Batalov osydan eki ai buryn Alakólge jumys saparymen Elbasy kelip, mundaǵy infraqurylymdy damytý baǵytyndaǵy jumystarǵa oń baǵa bergenin eske salyp ótti. Áýejai, temir jol vokzaly salynǵanyn, mundai jumystar úzdiksiz jalǵasatynyn tilge tiek etti.
– Alakóldiń shipaly sýyn, onyń jaǵalaýyndaǵy qolaily jaǵdaidy kópshilikke tanystyryp, nasihattai júrýimiz kerek. Búgingi dýatlonnan ótip otyrǵan týrinirdiń kól jaǵalaýynda uiymdastyrylýynyń ózi beker emes. Aldaǵy ýaqytta munda halyqaralyq jarystar ótkizýge de bolady, – dei kele A. Batalov jarysqa qatysýshylarǵa sáttilik tiledi.
Jarysty uiymdastyrýshy Dene shynyqtyrý jáne sport komiteti men Almaty oblysynyń ákimdigi týrnirge dýatlondy buqaralyq sport túri bolǵandyqtan tańdap alǵan. Oǵan kez kelgen niet bildirýshi azamat qatysa alady. Iaǵni kásibi sportshylarmen qatar áýesqoi sportsúier qaýym da qatysýǵa múmkindik aldy. Biyl ekinshi ret ótkizilip otyrǵan sharada 100-den astam sportshy baq synasty. Olardyń qatarynda Almaty oblysymen qatar, Almaty, Astana qalalarynyń, Shyǵys Qazaqstan jáne basqa da oblystardyń ókilderi bar.
Týrnirdiń birinshi kezeńindegi velojarysta sportshylar 20 shaqyrymǵa júrip ótse, dýatlonda velosipedpen 10 shaqyrymdy baǵyndyryp, sportshy ary qarai jarys jolyn júgirýmen jalǵastyrdy.
Jarys jeńimpazdaryna baǵaly syilyqtar men arnaiy diplomdar tapsyryldy.
Sondai-aq osy kúni belgili veloshabandoz Aleksandr Vinokýrovtyń velosipedi men Olimpiada jeńimpazdarynyń fýtbolkalary lotoreia bileti arqyly utysqa salyndy.
