جارىستىڭ سالتاناتتى اشىلۋىندا ءسوز سويلەگەن وبلىس اكىمى اماندىق باتالوۆ وسىدان ەكى اي بۇرىن الاكولگە جۇمىس ساپارىمەن ەلباسى كەلىپ، مۇنداعى ينفراقۇرىلىمدى دامىتۋ باعىتىنداعى جۇمىستارعا وڭ باعا بەرگەنىن ەسكە سالىپ ءوتتى. اۋەجاي، تەمىر جول ۆوكزالى سالىنعانىن، مۇنداي جۇمىستار ۇزدىكسىز جالعاساتىنىن تىلگە تيەك ەتتى.
– الاكولدىڭ شيپالى سۋىن، ونىڭ جاعالاۋىنداعى قولايلى جاعدايدى كوپشىلىككە تانىستىرىپ، ناسيحاتتاي ءجۇرۋىمىز كەرەك. بۇگىنگى دۋاتلوننان ءوتىپ وتىرعان ءتۋرينيردىڭ كول جاعالاۋىندا ۇيىمداستىرىلۋىنىڭ ءوزى بەكەر ەمەس. الداعى ۋاقىتتا مۇندا حالىقارالىق جارىستار وتكىزۋگە دە بولادى، – دەي كەلە ا. باتالوۆ جارىسقا قاتىسۋشىلارعا ساتتىلىك تىلەدى.
ءوز كەزەگىندە مادەنيەت جانە سپورت ءمينيسترى ارىستانبەك مۇحامەدي ۇلى شارانىڭ استانانىڭ 20 جىلدىعى اياسىندا ءوتىپ وتىرعانىن ايتتى. سونىمەن قاتار ەلباسىنىڭ تاپسىرماسىنا وراي وڭىردە ءتۋريزمدى، سونىڭ ىشىندە الاكول جاعاسىن دامىتۋعا قولداۋ ءبىلدىرىپ جاتقان ەل ازاماتتارىنا ريزاشىلىعىن ءبىلدىردى.
جارىستى ۇيىمداستىرۋشى دەنە شىنىقتىرۋ جانە سپورت كوميتەتى مەن الماتى وبلىسىنىڭ اكىمدىگى تۋرنيرگە دۋاتلوندى بۇقارالىق سپورت ءتۇرى بولعاندىقتان تاڭداپ العان. وعان كەز كەلگەن نيەت ءبىلدىرۋشى ازامات قاتىسا الادى. ياعني كاسىبي سپورتشىلارمەن قاتار اۋەسقوي سپورتسۇيەر قاۋىم دا قاتىسۋعا مۇمكىندىك الدى. بيىل ەكىنشى رەت وتكىزىلىپ وتىرعان شارادا 100-دەن استام سپورتشى ب ا ق سىناستى. ولاردىڭ قاتارىندا الماتى وبلىسىمەن قاتار، الماتى، استانا قالالارىنىڭ، شىعىس قازاقستان جانە باسقا دا وبلىستاردىڭ وكىلدەرى بار.
ءتۋرنيردىڭ ءبىرىنشى كەزەڭىندەگى ۆەلوجارىستا سپورتشىلار 20 شاقىرىمعا ءجۇرىپ وتسە، دۋاتلوندا ۆەلوسيپەدپەن 10 شاقىرىمدى باعىندىرىپ، سپورتشى ارى قاراي جارىس جولىن جۇگىرۋمەن جالعاستىردى.
جارىس جەڭىمپازدارىنا باعالى سىيلىقتار مەن ارنايى ديپلومدار تاپسىرىلدى.
سونداي-اق وسى كۇنى بەلگىلى ۆەلوشاباندوز الەكساندر ۆينوكۋروۆتىڭ ۆەلوسيپەدى مەن وليمپيادا جەڭىمپازدارىنىڭ فۋتبولكالارى لوتورەيا بيلەتى ارقىلى ۇتىسقا سالىندى.
