Sońǵy úsh jylda Jetisý oblysy Alakól aýdanyna kelgen týristerdiń sany 4,8 millionǵa jýyq adamǵa jetip, olarǵa 29,4 mlrd. teńgeniń qyzmeti kórsetilgen,- dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Aýdan ákimdiginiń málimeti boiynsha, biylǵy jyldyń ózinde 51 jumys orny ashylǵan 17 týristik nysan iske qosylyp, 2,4 mlrd teńge investitsiia tartyldy. Sonymen qatar 500 oryndyq 3 iri týristik nysannyń qurylysy júrgizilýde.
- Ekonomikanyń negizgi draiveri – investitsiia. Úsh jylda aýdanǵa tartylǵan investitsiia kólemi 305,9 mlrd. teńgege jetti. Biýdjetten tys qarajat esebinen 5 iri joba iske asyrylyp, 432 jumys orny ashyldy. Sonyń biri «Dostyq-Moiynty» temirjol jelisin salý jobasy negizinde aýdan aýmaǵynan ótetin 134 shaqyrym temirjol ýchaskesiniń qurylysy júrgizilýde. Sonymen qatar biyl «Dar Rail» seriktestigi logistikalyq park sala bastaidy, - deidi Alakól aýdanynyń ákimi Almas Abdinov.
Qurylys salasynda úsh jylda 79,5 myń sharshy metr turǵyn úi paidalanýǵa berilse, ótken bes aida onyń kólemi 8,3 myń sharshy metr bolyp otyr.
Aýdanda ortalyqtandyrylǵan aýyz sý júiesimen qamtylǵan eldi mekenderdiń úlesi 92,8 % jetti. Sol siiaqty sońǵy úsh jylda aýdandyq mańyzy bar 44,3 shaqyrym avtokólik joly jóndeldi. Al biyl 10 eldi mekenniń 24 kóshesi ortasha jóndeýden ótedi.
Bir atap óterligi, «Jaily mektep» ulttyq joba aiasynda Dostyq aýylynda 600 oryndy mekteptiń qurylysy júrip jatyr. Biyl paidalanýǵa beriledi dep kútilýde. Oǵan qosa búgingi kúnge deiin 1 feldsherlik-akýsherlik pýnkt, 7 blokty keshen ornatyldy. Basqa da áleýmettik nysandar qurylysyna kóp kóńil bólinýde.
