Ál-Farabi dańǵylynda úsh adamnyń ómirin qiǵan jol apatyna qatysty sot otyrysynda qaza tapqan qyzdardyń biri Tomiristiń ákesi alǵash ret sóz sóiledi, dep habarlaidy dalanews.kz.
Ol sottan ózin jábirlenýshi retinde tanýdy surap, qyzynyń ómirine árdaiym aralasyp, qamqorlyq kórsetkenin aitty. Qyzynyń qazasy týraly sóz qozǵaǵan sátte áke emotsiiasyn ustai almai, keiingi úsh aida durys uiyqtamaǵanyn jetkizdi.
Sondai-aq ol aiyptalýshyny keshirmegenin málimdep, buǵan deiin marqumnyń anasy ótemaqy alǵannan keiin talaptan bas tartqany óz ustanymyna áser etpeitinin aitty.
"Maǵan onyń aqshasy da, bailyǵy da kerek emes. Balamdy qaitaryp bersin", – dedi ol sotta.
Marqumnyń ákesi qorǵaýshylar tarapynan aitylǵan "aiyptalýshynyń otbasynan aqsha aldy" degen málimdemelerdi de teriske shyǵardy.
Otyrystyń qorytyndysy boiynsha sot onyń ótinishin qanaǵattandyryp, resmi túrde jábirlenýshi mártebesin berdi.
Eske salaiyq, ál-Farabi dańǵylynda bolǵan jol apaty 21 naýryzǵa qaraǵan túni tirkelgen edi. Tergeý málimetinshe, Zeekr kóliginiń júrgizýshisi qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Apat saldarynan Mercedes júrgizýshisi men eki jolaýshysy oqiǵa ornynda qaza tapqan. Qazirgi ýaqytta is sotta qaralyp jatyr.
