Túrkistanda 1 qazan – Halyqaralyq qarttar kúni merekesi atalyp ótti. Oblys ákimi Darhan Satybaldy jańadan boi kótergen «Dostyq úii» ǵimaratynda óńirdiń áleýmettik-ekonomikalyq damýyna qajyrly eńbek sińirgen ardagerlermen júzdesip, erkin pikir almasty. Óńirdi damytý jumystary men kórsetkishterge toqtalyp, bul igi jetistikterde qazynaly qarttarymyzdyń da úlesi mol ekenin atap ótti, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
– Sizderdi búgingi Halyqaralyq qarttar kúnimen, meiirim men izgilik merekesimen shyn júrekten qutttyqtaimyn! Úlkendi syilaý, olarǵa qurmet kórsetý – ejelden kele jatqan saltymyz. Sizder otanshyl bolmystaryńyzben, ataly sózderińizben el birligin saqtaýǵa úles qosyp júrsizder. Aǵa býynnyń memleketimizdiń qalyptasýyna, eldiń barlyq baǵytta turaqty damýyna, qoǵamdaǵy ultaralyq kelisimdi nyǵaitýǵa qosqan úlesi zor. Ásirese, qaita jańǵyrǵan Túrkistan oblysynyń jańa tarihynda esimderińiz qurmetpen atalary anyq. Ótken aptada Memleket basshysy Túrkistan oblysyna jumys saparymen kelip, aimaqtaǵy jumystardy joǵary baǵalady. Aǵa býynmen, ziialy qaýymmen júzdesip, aýyzbirshilikti saqtap kele jatqan ardagerlerge alǵys bildirip, eńbekqorlyqty nasihattaýǵa shaqyrdy. Sizder osy ustanymǵa sai bolyp, elimizdiń, oblysymyzdyń damýyna úles qosyp kelesizder. Osy eńbekterińiz úshin shynaiy alǵysymdy bildiremin! – dedi oblys ákimi.
Memleket basshysynyń bastamasymen «Túrkistan qalasynyń erekshe mártebesi týraly» Zań jobasy ázirlenip, Parlament qaraýyna usynyldy. Atalǵan zań, Túrkistannyń tarihi kelbetin, Iassaýi kesenesin saqtaý, qalanyń rýhani baǵytta órkendeýiniń kepili bolmaq. Osy igi bastamalardy júzege asyrýda ardagerlerdiń aqyl-keńesi men tájiribesi nazarǵa alynatynyn atap ótken Darhan Satybaldy bir top ardagerdi «Oblysqa sińirgen eńbegi úshin» tósbelgisi men oblys ákiminiń Qurmet gramotasymen marapattady.
«Ardagerler uiymy» respýblikalyq birlestiginiń Túrkistan oblystyq filialynyń tóraǵasy Jeńisbek Máýlenqulov, «Túrkistan oblysynyń Aqsaqaldar alqasy» qoǵamdyq birlestiginiń tóraǵasy Jarylqasyn Áziretbergenuly, «Qoǵamdyq kelisim» KMM janyndaǵy Aqsaqaldar keńesiniń tóraǵasy Sozaqbai Ábdiqulov, Túlkibas aýdandyq Ájeler alqasynyń tóraiymy Kúlbibi Eshenqulova, «Ardagerler uiymy» respýblikalyq qoǵamdyq birlestiginiń Tólebi aýdandyq filialynyń tóraǵasy Átirhan Shyńǵysbaevtar bátýaly oilar aityp, óńirdi damytý, el birligin saqtaý, rýhaniiat, ardagerlerge qoldaý kórsetý baǵytyndaǵy pikirlerin bildirdi.
Kezdesý saltanatty is-sharaǵa ulasyp, qazynaly qarttarǵa qurmet kórsetildi. Merekelik dastarqanda kontsert tamashalady. Oblys ákiminiń orynbasary Beisenbai Tájibaev quttyqtaý sóz sóilep, eńbegi elengen ardagerlerge alǵys hat tabystady. Jiyn barysynda birqatar ardager oblystyq máslihat pen «Amanat» partiiasynyń Túrkistan oblystyq filialynyń atynan marapattaldy. «Ardagerler uiymy» respýblikalyq birlestiginiń Túrkistan oblystyq filialynyń tóraǵasy Jeńisbek Máýlenqulov izgi lebizin bildirip, tósbelgiler tapsyrdy. Oblystyń 150-den astam zeinetker men ardager qatysqan merekelik shara ári qarai kontserttik baǵdarlamaǵa ulasyp, Shámshi Qaldaiaqov atyndaǵy filarmoniia men «Jańa lep» óner ujymy, «Samǵaý» bi toby óner kórsetti.
Túrkistan oblysynda zeinetkerler men qarttardyń áleýmettik jaǵdaiyn jaqsartý baǵytynda júieli jumys atqarylyp keledi. Óńirlerde «Belsendi uzaq ómir súrý» ortalyqtaryn ashý tapsyrylǵan. Osy atalǵan jospardy iske asyrý aiasynda búgingi tańda oblysta 15 ortalyq ashylyp, 80 myńǵa jýyq zeinetker tiisti qyzmettermen qamtylýda. Túrkistan qalasynda osyndai ortalyqtarǵa suranysy kóbeiýine bailanysty qalanyń kórikti jerlerinde 3 ortalyq zeinetkerlerge qyzmet kórsetýde. Bul ortalyqtarda qariialarǵa barlyq jaǵdai jasalǵan.
Jalpy oblysta 200 myńǵa jýyq zeinet jasyndaǵy qart pen ardagerler turady. Onyń 11-i Uly Otan soǵysynyń ardagerleri bolsa, 3,2 myńnan astamy tyl eńbekkerleri. Sonymen qatar 100 jastan asqan 60 qart azamat turady. Onyń ishinde jasy eń úlkeni – Jetisai aýdanynyń 110 jasqa tolǵan turǵyny Begbaeva Ýngai.
Oblystyq biýdjet esebinen demalys oryndarynda 8 myńǵa jýyq qariia demalyp, densaýlyǵyn túzeidi. Sol demalys oryndarynyń biri – «Ardagerler úiin» Túrkistan oblysyna kóshirip, kelesi jyly ardagerlerdi qabyldaý kózdelip otyr.
Aita keteiik, elimizde jyl saiyn bul mereke saltanatty túrde atalyp ótedi. Túrkistan oblysynyń da barlyq aýdan, qalasynda maǵynaly is-sharalar uiymdastyrylyp, ardagerler ardaqtalýda.
