Merki aýdany ákimniń orynbasary Meiirjan Súleimenov óziniń basshysynyń jaily ornyn ielenýge 50 myń dollar bermek bolypty. Basshy bolýdan dámeli sheneýniktiń telefonmen sózderi ulttyq biýronyń qolyna tigen. Óz kezeginde Merki aýdany ákiminiń orynbasary Meiirjan Súleimenov:
– Endi telefonmen kim ne aitpaidy? Sondai áńgime bolǵan shyǵar. Iá, Almatyǵa aýysamyn degen jumystar bolǵan. Biraq ol jerde joldastarmen salmaqty áńgime bolǵan emes. «Satyp alamyn, osynshama aqsha beremin» degen. Oinap, dostarmen bir jerde aitqan shyǵarmyn, – depti shimirikpesten.
Oinasa da, oiyndaǵysyn aitqan Meiirjan Súleimenovtiń isi ádep keńesinde maishammen qaraldy.
Sheneýnik qylyǵyna jaýap bere almai ábden sasty. Aita ketetin jaǵdai, atqaminerdiń ákimniń ornyn suraǵany kezdeisoq anyqtalǵan. Iaǵni, basqa bir is boiynsha kúdik týǵyzǵan Súleimenovti ulttyq biýro ókilderi baqylaýǵa alypty.
Onyń telefonyn tyńdaý barysynda oryntaq saýdasy jónindegi áńgime áshkere bolǵan. Al oǵan qyzmet áperýge ýáde etken óńirge tanymal kásipker bolyp shyqty. Onyń taǵdyry ázirge belgisiz. Belgilisi, ádep keńesi Súleimenovti qyzmetinen tómendetý jóninde usynys berdi.
Degenmen sońǵy sheshimdi Merki aýdany ákiminiń ózi qabyldaidy. Meiirhan Ómirbekovtiń ózin qyzmetten yǵystyrǵysy kelgen orynbasaryna qandai shara qoldanatynyn ýaqyt kórsetedi.
Ákim orynbasarynyń ne aitqany jaiynda Jambyl oblysy boiynsha sybailas jemqorlyqqa qarsy is-qimyl departamentiniń asa mańyzdy ister jónindegi ofitseri Qairat Dúnbaev:
– Rýstambekov aitady, seniń máseleń sheshilip jatyr, solai-solai dep. Bul kisi jaýap beredi. Suraidy. Taǵaiyndalǵan kezde 200 myń dollar bolmai ma, ústeme suramaima, azar bolsa 50 myń shyǵar bere alatynym, keiin ony qaidan shyǵaryp alamyn degen siiaqty áńgimeler. Sondai birneshe áńgime. Shólenbaev Baqytqan degen kisimen. Naqty taǵaiyndalý boiynsha. Aýdan ákimine, – dedi.
