Túrkistan oblysy ákimi Memleket basshysynyń ekonomikany ártaraptandyrý, importqa táýeldilikti barynsha azaitý, qoǵamdyq ál-aýqatty arttyrý sekildi máselelerdi sheshý boiynsha bergen tapsyrmalaryn tyńǵylyqty oryndaý qajettigin aitty.
Buǵan deiin oblys ákimi kásipkerlik belsendilikti jáne investitsiialyq tartymdylyqty kúsheitý týraly tapsyrma bergen bolatyn. Búgin sol tapsyrmalardyń júzege asý barysy baiandaldy.
Atap aitqanda, mal qaldyqtaryn ashyq jerge tókpeý úshin qaldyqtardy qabyldaityn oryn ashyldy. Alda jergilikti kásipkerler ony óńdeitin kásiporyn salýdy kózdep otyr. Sonymen qatar avtomatty gazdalǵan beton shyǵaratyn zaýyt ashylmaq. Investorlar kómegimen jylyna 20 myń tonna tonna ónim shyǵaratyn qus fabrikasyn salýdy qolǵa almaq.
Basqosýǵa 50-ge jýyq isin jańa bastaǵan jáne jumys istep júrgen kásipkerler qatysty. Kezdesý erkin qarym-qatynas formatynda ótti. Onda biznesti qoldaý baǵytyndaǵy memlekettik qoldaý sharalary keńinen talqylandy. Biznes qordalanǵan máseleleri men usynysyn aitty.
Sonymen qatar sharaǵa memlekettik organdardyń ókilderi qatysty. Sairam aýdanynyń kásipkerleri tájiribe jinaý úshin Qytai eline barýdy josparlaýda. Ondaǵy zaýyt, fabrikalardyń jumysymen tanyspaq.
– Kásipkerlerdiń jeke bastamasyna barynsha qoldaý kórsetý qajet. Bul baǵytta jumystarǵa kúsh salamyz. Sairam aýdanynda kásipkerliktiń damý qarqyny jaqsy. Osyny damytý kerek. Oǵan aýdanda ashylatyn indýstrialdyq aimaqtyń úlesi mol bolmaq.
Biz memleket pen biznes arasynda jańa qarym-qatynas ornatýymyz kerek. Búgingi basty mindetimiz – biznes pen memlekettik apparattyń tolyq ózara is-qimylyn qamtamasyz etý.
Sizderdiń bastamalaryńyz týraly únemi habardarmyn. Qytai saparynan keiin ózderińizden jaqsy bastamalar kútemiz. El damýyndaǵy oń ózgerister biznespen tikelei bailanysty bolǵandyqtan saiasi reformalardy birlese júzege asyrý kerekpiz.
Memleket kásipkerlikti damytý úshin qolaily orta qalyptastyryp, kásipkerler qoǵamǵa, halyqqa qyzmet etse, bul óz kezeginde eldiń ál-aýqatyn arttyrýǵa, turmys deńgeiin kóterýge yqpal etetindigi sózsiz. Osyǵan orai biznes ókilderin jańa jobalardy birlese júzege asyrýǵa shaqyramyn, – dedi Darhan Satybaldy.
Kásip ieleri elektrenergiia tapshylyǵy jaily sóz qozǵady. Máseleni sheshý joldary qarastyrylady. Kásibin keńeitýdi kózdegender jer qarastyrý jaily suranys berdi. Sondai-aq, maman tapshylyǵy máselesin kótergen kásipkerler zaýyttarda injener-mehanik mamandyǵy jetispeitinin jetkizdi. Ol úshin arnaiy oqý oryndarymen bailanys ornatý qolǵa alynatyn boldy.
Mundai kezdesýler aldaǵy ýaqytta turaqty túrde ótkiziletin bolady.
