Merekelik jıynda Túrkistan oblysynyń ákimi Janseıit Túımebaev óńirdegi barlyq joǵary oqý oryndarynyń úzdik túlekterine saltanatty túrde dıplom tapsyryp, olardy Túrkistan qalasynda jumys isteýge shaqyrdy. Bıyl Túrkistan qalasynyń oblys ortalyǵy bolýyna oraı 300 jas mamanǵa «Jastar praktıkasy» baǵdarlamasy arqyly jumys usynylyp otyr. Oǵan oblystyq búdjetten arnaıy qarjy bólinedi.
– Bıyl óńirimizdegi 12 joǵary, 94 orta arnaýly oqý oryndaryn 36 myńnan astam stýdent bitirip, jas maman atanyp otyr.Oblysymyz jańa ataýǵa ıe bolyp Túrkistan oblysy quryldy. Qurylyp jatqan aýmaqtardy damytý úshin naqty is-sharalardyń jol kartasyn ázirlenip, Túrkistanda jańa ákimshilik ǵımarattary men turǵyn úıler salynady. Jańarǵan Túrkistan oblysynyń bolashaǵy, damýy, órkendeýi Sizderdiń qoldaryńyzda.Osy múmkindikterdi paıdalana otyryp, Túrkistan oblysynyń damýyna óz úlesterińizdi qosýǵa shaqyramyn. Sizder sıaqty jas, bolashaǵynan kóp úmit kúttiretin mamandar bizge qajet. Búgingi kúni oblysymyzda «Jastar praktıkasy» boıynsha 3516 jas, «Dıplommen – aýylǵa» baǵdarlamasy boıynsha 598 jas maman jumys isteıdi. Sizderge de dál osy baǵdarlamalar boıynsha jumysqa ornalasyp, jumys isteýge múmkindik bar.Osyǵan oraı, barshańyzdy ózderińizge berilgen múmkindikterdi utymdy paıdalanyp, Túrkistan qalasyna kelip, jastar praktıkasynan ótip, memlekettik organdardyń konkýrstaryna qatysýǵa shaqyramyn. Árbir jas mamannyń óziniń biliktiligine sáıkes jumysqa ornalasýy meniń jeke baqylaýymda bolatyndyǵyn nazarlaryńyzǵa jetkizemin. Saparlaryńyz sátti, armandaryńyz asqaq, murattaryńyz baıandy bolsyn, – dedi Janseıit Túımebaev.
Bıyl oblystaǵy 12 joǵary oqý ornyn 15 myńnan astam túlek támamdady. Olar 58 fakúltette 481 mamandyq boıynsha bilim aldy. Solardyń arasynda 895 stýdent sabaqty jaqsy oqyp, úzdik dıplom ıegeri atandy. Úzdik dıplomǵa bitirýshiler sany byltyrǵy oqý jylymen salystyrǵanda kóbeıgen.
Sonymen qatar, oblystaǵy 94 kolejde 109 mamandyq boıynsha 74176 stýdent bilim alady (onyń ishinde 43 memlekettik kolejde 38701 stýdent, 51 jekemenshik kolejde 35475 stýdent). Olardyń memlekettik tapsyryspen oqıtyny — 34592, ıaǵnı,46,66 paıyzdy quraıdy. Bıyl kolejderdi 96 mamandyq boıynsha 21249 stýdent bitirip, elimizdiń ekonomıkasyn órkendetýge úlesterin qospaq.Kolejderdi bitirýshi túlekterdiń sońǵy úsh jylda jumyspen qamtylý kórsetkishi 2015 jyly - 88,6 paıyzdy, 2016 jyly 86,2 paıyzdy qurasa, 2017 jyly 80,7 paıyzdy qurady.
Saltanatty dıplom tabystaý rásimine halyqaralyq, respýblıkalyq, oblystyq deńgeıdegi bilim, ǵylym, mádenıet pen sport salasyndaǵy baıqaýlar men jarystarda erekshelenip, oqý úlgerimi «óte jaqsy» degen GPA baly keminde 3.67-den tómen emes úzdik 300 túlek marapattaldy. Bitirýshi túlekter arnaıy qyzyl kilemshemen júrip ótip, arnaıy dıplom men tósbelgige ıe boldy.
Saltanatty keshte oblys ákimimen qatar oblystyq maslıhattyń depýtattary, zıaly qaýym ókilderi, JOO basshylary, mesenattar men kásipkerler deqatysyp, úzdik túlekterge dıplom tapsyrdy. Jas mamandardyń elge adal qyzmet etip, bıikterden kórinetinine senim bildirdi.
Oblys ákimdigine qarasty «Jastar resýrstyq ortalyǵy» uıymdastyrǵan is-shara Astana qalasynyń 20 jyldyq mereıtoıyna arnaldy. Merekelik baǵdarlamada oblysqa jáne elimizge tanymal óner juldyzdary óner kórsetti. İs-shara sońy otshashýmen aıaqtaldy.
