Merekelik jiynda Túrkistan oblysynyń ákimi Janseiit Túimebaev óńirdegi barlyq joǵary oqý oryndarynyń úzdik túlekterine saltanatty túrde diplom tapsyryp, olardy Túrkistan qalasynda jumys isteýge shaqyrdy. Biyl Túrkistan qalasynyń oblys ortalyǵy bolýyna orai 300 jas mamanǵa «Jastar praktikasy» baǵdarlamasy arqyly jumys usynylyp otyr. Oǵan oblystyq biýdjetten arnaiy qarjy bólinedi.
Sonymen qatar, oblystaǵy 94 kolledjde 109 mamandyq boiynsha 74176 stýdent bilim alady (onyń ishinde 43 memlekettik kolledjde 38701 stýdent, 51 jekemenshik kolledjde 35475 stýdent). Olardyń memlekettik tapsyryspen oqityny — 34592, iaǵni,46,66 paiyzdy quraidy. Biyl kolledjderdi 96 mamandyq boiynsha 21249 stýdent bitirip, elimizdiń ekonomikasyn órkendetýge úlesterin qospaq.Kolledjderdi bitirýshi túlekterdiń sońǵy úsh jylda jumyspen qamtylý kórsetkishi 2015 jyly - 88,6 paiyzdy, 2016 jyly 86,2 paiyzdy qurasa, 2017 jyly 80,7 paiyzdy qurady.
Saltanatty diplom tabystaý rásimine halyqaralyq, respýblikalyq, oblystyq deńgeidegi bilim, ǵylym, mádeniet pen sport salasyndaǵy baiqaýlar men jarystarda erekshelenip, oqý úlgerimi «óte jaqsy» degen GPA baly keminde 3.67-den tómen emes úzdik 300 túlek marapattaldy. Bitirýshi túlekter arnaiy qyzyl kilemshemen júrip ótip, arnaiy diplom men tósbelgige ie boldy.
Saltanatty keshte oblys ákimimen qatar oblystyq maslihattyń depýtattary, ziialy qaýym ókilderi, JOO basshylary, metsenattar men kásipkerler deqatysyp, úzdik túlekterge diplom tapsyrdy. Jas mamandardyń elge adal qyzmet etip, biikterden kórinetinine senim bildirdi.
Oblys ákimdigine qarasty «Jastar resýrstyq ortalyǵy» uiymdastyrǵan is-shara Astana qalasynyń 20 jyldyq mereitoiyna arnaldy. Merekelik baǵdarlamada oblysqa jáne elimizge tanymal óner juldyzdary óner kórsetti. Is-shara sońy otshashýmen aiaqtaldy.
