"Maiqaiyń" altyn kenishindegi apatta is-túzsiz joǵalǵan eki qutqarýshynyń týystary izdestirý jumystaryn jalǵastyrýdy talap etip jatyr. Qara jamylǵan otbasylar jaqyndarynyń endi tiri tabylatynyna senbeidi. Tipti úmitin úzgenderin de aityp otyr, - dep habarlaidy Dalanews.kz KTK telearnasyna siltep.
Eń bolmasa denelerin jer betine shyǵaryp, aqtyq saparǵa shyǵaryp salsaq deidi. Alaida kombinat basshylary izdestirýdiń qashan bastalatynyn aita almai otyr.
"Maiqaiyń" kenishinde apat bolǵanyna eki aidan asa ýaqyt ótti. Biraq jer astyna túsip ketken eki qutqarýshynyń denesi sol kúii tabylǵan joq. 36 jastaǵy Aidos Shaimerden men 55 jastaǵy júrgizýshi Aiyp Tileýbergenovtiń týystary izdeý jumystarynyń jalǵastyrylýyn talap etip otyr.
"Bizdiń bar tilegimiz – súiegin alýymyz. Adam siiaqty jerlep, jer qoinaýyna tapsyrý. Erteń men onyń balalaryn qai jerge aparamyn? "Papam qai jerde jatyr?" dese, qai jerge aparamyn? Topyraqtyń astynda qaldy deimin be? Qai topyraqtyń astynda qalǵanyn da bilmeimiz. Balalaryna ne dep aitamyn? Sol úshin baýyrymnyń súiegin alyp berýdi talap etemin", - deidi Aitjan Qaikina.
Osydan birneshe apta buryn ken baiytý fabrikasy jumysyn sáýir aiyna deiin ýaqytsha toqtatqanyn málimdegen edi. Buǵan qordaǵy altyn rýdasynyń taýsylýy sebep boldy. Alaida bir apta óter-ótpesten kombinattaǵy jumys jandandy. Al úiindi astynda qalǵan qutqarýshylardy izdeý sol kúii toqtaǵan. Sebebi opyrylǵan jerdi zerttegen arnaiy komissiia bos shuńqyrlardy anyqtaǵanda topyraqtyń opyrylý qaýpi joǵary ekenin anyqtady. Alaida qaiǵydan qan jutqan otbasylar avtobýsty esh kedergisiz alyp shyǵýǵa múmkindik bar deidi. Olardyń aitýynsha, izdeý jumysy qaýipke emes, qarajatqa bailanysty toqtaǵan eken.
"Bas direktor ózi aitty: "Men bul jaǵdaidy sheshe almaimyn, bizde qarajat joq" dedi. Aldynda jobalaýshylar keldi. Olarǵa 140 million tóleý kerek boldy. Sony bul kisiler "ondai qarajat joq" dep, bas tartyp otyr", - deidi Kenjebai Qaikin.
Qos qutqarýyshynyń týystary bas direktor Qýanysh Botinmen kezdespekke kún saiyn kombinattyń aldyna jinalady. Olardyń aitýynsha, eki ai ishinde basy daýǵa qalǵan kásiporyn basshysymen múldem júzdespegen. Qaiǵyly jaǵdaidan 70 kún ótken soń kásiporyn direktorymen alǵash kezdesken otbasylar basshyny suraqtyń astyna alǵany sol edi, jaýap qaiyra almaǵan direktor ketip qaldy.
"Mine, eki aidan asty, ol kisiniń túrin endi kórip otyrmyn. Eki aidyń ishinde bir ret kelgen emes. Keshe ákimdikte jinalys boldy, al ol kisi taǵy joq. Bas direktor emes pe? "Maiqaiyń altynnan" eshqandai ókil kelmeidi. Týystarǵa eshkim eshnárse túsindermeidi. Osylai at-tonyn ala qashady. Jaýapkershilikti bular da, jumys orny da alǵysy kelmeidi. Bir-birine silteidi. Bul jumysty bireý bastaý kerek qoi", - deidi qutqarýshynyń jubaiy Jansulý Sháimerden.
Aidos Shaimerden men Aiyp Tileýbergenovtiń denesin izdeý jumysy qashan qolǵa alynary belgisiz. Qaiǵy jutqan qos azamattyń týystary kompaniia basshylyǵynyń sheshimin kútip otyr. Izdeýdi jalǵastyrýdy talap etip otyrǵan otbasylar qutqarýshylardyń denesin tabý úshin sońyna deiin barýǵa bekinip otyr.
