M.O. Áýezov atyndaǵy Ádebiet jáne óner institýty men «Ǵylym ordasy» respýblikalyq memlekettik kásipornynyń uiymdastyrýymen kórnekti ǵalym, akademik, QR Memlekettik syilyǵynyń iegeri Seiit Asqaruly Qasqabasovtyń 85 jyldyǵyna arnalǵan «Akademik Qasqabasov fenomeni: ǵylymi mektepter, teoriialar jáne tájiribeler» atty halyqaralyq ǵylymi-teoriialyq konferentsiia ótti.
Konferentsiiada Seiit Qasqabasovtyń ǵylymǵa jáne ult rýhaniiatyna sińirgen eren eńbegi, otandyq jáne álemdik folklortanýdaǵy orny, qalyptastyrǵan ǵylymi mektebi jan-jaqty taldanyp, saralandy. Is-sharaǵa ǵalymnyń otbasy, otandyq jáne sheteldik ǵalymdar, memleket jáne qoǵam qairatkerleri, joǵary oqý oryndary men ǵylymi-zertteý institýttarynyń professor-oqytýshylar quramy men jas zertteýshiler qatysty.
Is-shara akademik Seiit Qasqabasovtyń jarqyn rýhyna arnalyp, bir minýt únsizdikpen ashyldy. Bul – ult ǵylymyna ólsheýsiz úles qosqan tulǵany eske alý men qurmet belgisi boldy. Konferentsiiany Ádebiet jáne óner institýtynyń bas direktory, akademik Kenjehan Matyjanov júrgizip, ǵalymnyń ǵylym men ádebi muraǵa degen erekshe kózqarasyn, shákirt tárbieleýdegi úlgisi men ustanymyn atap ótti.
Konferentsiia barysynda QR Parlamenti Senatynyń Tóraǵasy Máýlen Áshimbaevtyń, QR Ǵylym jáne joǵary bilim ministri Saiasat Nurbektiń, QR Mádeniet jáne aqparat ministri Aida Balaevanyń, Almaty qalasynyń ákimi Darhan Satybaldynyń quttyqtaý hattary oqylyp, tabys etildi.
Senat depýtaty, akademik Darhan Qydyráli akademik Seiit Qasqabasovtyń qazaq folklortaný ǵylymyndaǵy kóshbasshy rólin, ulttyq rýhaniiatty júieli zertteý men ǵylymi mektep qalyptastyrýdaǵy erekshe eńbegin erekshe atap ótti.
Plenarlyq májiliste QR Memlekettik syilyǵynyń laýreaty Saýytbek Abdrahmanov ustazynyń ǵylymi parasattylyǵy men intellektýaldyq talaptaryn sipattaityn «Parasat imperativi» taqyrybyndaǵy baiandamasyn jasady. Ál-Farabi atyndaǵy QazUÝ janyndaǵy Abai ǵylymi-zertteý institýtynyń direktory Janǵara Dádebaev «Dara tulǵa» baiandamasynda akademiktiń ádebietke kózqarasy men ǵylymi adamgershiligin tereń taldady. Túrkiianyń Ege ýniversitetiniń professory Metin Ekiji onlain formatta «Seiit Qasqabasovtyń túrki dúniesi folklortanýyndaǵy orny» týraly baiandama jasady. L.N. Gýmilev atyndaǵy EUÝ professory Serik Negimov ǵalymnyń shyǵarmashylyq joly men folklor men jazba ádebietti sabaqtastyrýdaǵy biregei kózqarasyn keńinen taldady.
Konferentsiia sońynda filologiia ǵylymdarynyń doktorlary Kárimbek Qurmanáliev, Qanseiit Ábdezuly, Anarbai Buldybai, Túrki akademiiasynyń sarapshysy Aqedil Toishanuly, Islam ǵylymi-zertteý institýtynyń direktory Tóráli Qydyr jáne Mońǵoliia Ulttyq ýniversitetiniń doktoranty Orgil Búrenjargal sóz alyp, akademiktiń ǵylymi murasynyń ózektiligi men yqpaly týraly pikirlerin bildirdi. Ǵalym eńbekteriniń folklortaný men ádebiettaný salasyndaǵy jańashyl baǵyttarǵa negiz bolǵany jáne onyń teoriialyq tujyrymdarynyń jas zertteýshiler úshin mańyzdy baǵdar ekeni erekshe ataldy.
Sonymen qatar, Ǵylym ordasynyń Ortalyq ǵylymi kitaphanasynda Seiit Asqarulynyń jeke jáne jetekshiligimen jaryq kórgen eńbekterinen arnaiy kórme uiymdastyryldy.
Akademik Seiit Qasqabasovtyń ǵylymi murasyn arqaý etken bul halyqaralyq konferentsiia – qazaq folklortanýy men gýmanitarlyq ǵylym damýynyń jańa kezeńine bastar mańyzdy ǵylymi-rýhani oqiǵa boldy. Konferentsiiada aitylǵan baiandamalar men pikirler ǵalym qalyptastyrǵan ǵylymi mekteptiń áleýetin, onyń teoriialyq tujyrymdarynyń zamanǵa sai mańyzdylyǵyn kórsetti. Bul shara ulttyq ǵylymnyń irgesin nyǵaityp, rýhani sabaqtastyqty jalǵastyrýdaǵy irgeli qadamǵa ainaldy. Akademik Seiit Qasqabasovtyń ilimi men rýhani murasy – bolashaq urpaq úshin sarqylmas qazyna ári zertteýshilerge baǵyt-baǵdar bolyp qala beredi.
