Belgili advokat Danilhan Shaǵataev Air Astana áýe kompaniiasynyń kinásinen qazaqstandyq bala Túrkiia áýejailarynyń birinde eki táýlik jalǵyz qalyp qoiǵanyn jetkizdi, dep habarlaidy Dalanews.kz.
10 jastaǵy bala oqý-jattyǵý jiyndaryna qatysý úshin áýe kompaniia qyzmetkerleriniń qaraýymen sapar shekken. Alaida Túrkiiaǵa jetken kezde onyń tólqujaty joǵalyp ketkeni belgili bolǵan.
Sol kezde Air Astana qyzmetkerleri balany áýejai qyzmetkerlerine tapsyryp, jaýapkershilikten bas tartqan. Al áýejai qyzmetkerleri ony deportatsiiaǵa arnalǵan bólmege jaiǵastyrǵan.
Nátijesinde, bala bólmede eki kún jalǵyz qalyp, tamaq suraý úshin Google aýdarmashysyn paidalanǵan. Osy ýaqyt ishinde Qazaqstannyń konsýldyq qyzmeti men týystary tólqujattyń kóshirmesin daiyndaǵansha, bala sol jerde kútýge májbúr bolǵan.
"Balaǵa qarapaiym qoldaý da kórsetilmedi. Ony kútip alýshy tarap tranzit aimaǵynyń qatań erejelerine bailanysty kómek kórsete almady. Al bala shet tilderin bilmegendikten, shekara qyzmetkerleri men áýejai qyzmetkerleriniń sózderin túsinbei, qatty qorqyp, ne isterin bilmei otyrdy", — dedi advokat.
Sóitip balanyń anasy Antaliiadaǵy Qazaqstannyń Bas konsýldyǵymen bailanysqa shyǵyp, eki kún ótkennen keiin balaǵa ýaqytsha qujat rásimdelgen.
